ភ្នំពេញ៖ ព្រះរាជអាជ្ញាអមសាលាដំបូង ខេត្តព្រះសីហនុ បានសម្រេចចោទប្រកាន់បុគ្គល២នាក់ ដែលគេចចេញពីផ្ទះ ក្នុងតំបន់ចត្តាឡីស័ក នៅក្រុងព្រះសីហនុ និងស្នើសុំឲ្យឃុំខ្លួនបណ្តោះអាសន្នដាក់ពន្ធនាគារ។
យោតាមសេចក្តីប្រកាសព័ត៌មានរបស់តំណាងអយ្យការសាលាដំបូងខេត្តព្រះសីហនុ បានបញ្ជាក់ថា កាលពីថ្ងៃទី១០ និងថ្ងៃទី១២ ខែមេសា ឆ្នាំ២០២១ ស្ថិតនៅចំណុចភូមិ៣ (ទំនប់រលក) សង្កាត់លេខ១ ក្រុងព្រះសីហនុ មានជនសង្ស័យចំនួន០២នាក់ មានឈ្មោះ គឹម សុខរ៉ា ភេទប្រុស អាយុ៣០ឆ្នាំ និងឈ្មោះ គឹម ជាវី ឬគឹម ថារី ភេទប្រុស អាយុ៣១ឆ្នាំ បានធ្វើសកម្មភាពចេញពីផ្ទះក្នុងតំបន់ ដែលរដ្ឋបាលខេត្តព្រះសីហនុ ដាក់តំបន់នោះជាមណ្ឌលចត្តា ឡីស័ក។
នៅថ្ងៃទី១០ ខែមេសា ឆ្នាំ២០២១ វេលាម៉ោង ២៣និង០០នាទី ឈ្មោះ គឹម សុខរ៉ា បានចេញពីផ្ទះក្នុងតំបន់ចត្តាឡីស័ក ចំណែកឈ្មោះ គឹម ជារឺ ឬគឹម ថារី បានជិះម៉ូតូ១គ្រឿងម៉ាក Honda Dream C-125 ពណ៌ខ្មៅ សេរី ឆ្នាំ២០២០ ពាក់ផ្លាកលេខ ព្រះសីហនុ 1I-3233 គេចចេញពីផ្ទះក្នុងតំបន់ដែលជាមណ្ឌលចត្តាឡីស័ក នៅថ្ងៃទី១២ ខែមេសា ឆ្នាំ២០២១ រំលងអធ្រាត្រ។ បន្ទាប់ពីទទួលបានព័ត៌មាន ពីកម្លាំងប្រជាការពារ យាមគោលដៅថា មានមនុស្សរត់គេចចេញ ពីកន្លែងចត្តាឡីស័ក ក្រោយមកកម្លាំង សមត្ថកិច្ចបានធ្វើការស្រាវជ្រាវ រហូតឃាត់ខ្លួន បានជនសង្ស័យទាំងពីរ នាក់ខាងលើនេះតែម្តង។
ករណ៏នេះតំណាងអយ្យការសម្រេចចោទប្រកាន់លើជនសង្ស័យខាងលើ តាមរយៈដីកាសន្និដ្ឋានបញ្ជូនរឿងឲ្យស៊ើបសួរលេខ ១៥២អ.យ.គ/២១ ចុះថ្ងៃទី១៤ ខែមេសា ឆ្នាំ២០២១ ពីបទ៖ គេចេះពីការធ្វើចត្តាឡីស័ក ឬគេចចេញពីកន្លែងធ្វើចត្តាឡីស័ក បទល្មើសដែលមានបញ្ញត្តិឲ្យផ្តន្ទាទោសតាមមាត្រា៧ នៃច្បាប់ស្តីពីវិធានការទប់ស្កាត់ការឆ្លងរាលដាលនៃជំងឺកូរឹង-១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរ ផ្សេងទៀត ដោយតំណាងអយ្យការបានធ្វើការស្នើសុំឲ្យឃុំខ្លួនបណ្តោះអាសន្នបញ្ជូនសំណុំរឿងទៅចៅក្រមស៊ើបសួរ ដើម្បីចាត់ការតាមទីតិវិធី។
អ្នកនាំពាក្យ នៃអយ្យការអមសាលាដំបូងខេត្តព្រះសីហនុ សូមអំពាវនាវដល់សាធារណជន ចូលរួមគោរពច្បាប់ស្តីពីវិធានការទប់ស្កាត់ការឆ្លងរាលដាលនៃជំងឺកូរឹង-១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត និងលិខិតបទដ្ឋានគតិយុត្តិនានាពាក់ព័ន្ធដទៃទៀត ព្រមទាំងវិធានការ «៣ ការពារ ៣កុំ» របស់សម្តេចតេជោនាយករដ្ឋមន្ត្រី នៃកម្ពុជា រួមមាន៖
៣ ការពារ ៖ ពាក់ម៉ាស់, លាងដៃ, គម្លាតសង្គម គម្លាតបុគ្គល
៣ កុំ ៖ កុំចូលទៅ កន្លែងបិទជិត, កុំទៅកន្លែងមានមនុស្សច្រើន, កុំប៉ះពាល់គ្នា កុំចាប់ដៃ កុំកៀកស្មា កុំឱបគ្នាជាដើម៕
