ភ្នំពេញ៖ បុរសម្នាក់បើករថយន្តម៉ាកយីឌុប ពាក់ស្លាកលេខ «ខម» មួយគ្រឿង លួចបង្កប់ជនជាតិចិនប្រុស-ស្រី២នាក់ ក្នុងគោលបំណងដឹកជម្លៀស ពីភ្នំពេញទៅបាវិត តែបានពាក់កណ្ដាលផ្លូវត្រូវ កម្លាំងកងរាជអាវុធហត្ថ ក្របួចជាប់ ។
ករណីលួចបង្កប់ជនជាតិចិន ល្មើសនឹងបម្រាមការហាមឃាត់ ការធ្វើដំណើរឆ្លងកាត់ពីខេត្តមួយទៅខេត្តមួយ ដើម្បីទប់ស្កាត់ការរីករាលដាលជំងឺកូវីដ១៩នេះ បានកើតឡើងកាលពីថ្ងៃទី១១ ខែមេសា ឆ្នាំ២០២១ នៅស្រុកលើកដែក ខេត្តកណ្ដាល ។
បុរសអ្នកបើកបររថយន្តយីឌុបខាងលើនៅមិនទាន់ស្គាល់អត្តសញ្ញាណនៅឡើយ បានដឹកជនជាតិចិន២នាក់ពីភ្នំពេញទៅក្រុងបាវិត លុះមកដល់ស្រុកលើកដែក បានបុកបារ៉ាស់សមត្ថកិច្ចបន្តឆ្លងស្ពានអ្នកលឿង ចូលទៅដល់ទឹកដីព្រៃវែង ត្រូវសមត្ថកិច្ចខាងព្រៃវែង ឃាត់ខ្លួនប្រគល់ឲ្យខេត្តកណ្តាលវិញ ៕
