ភ្នំពេញ៖ ជនសង្ស័យជាជនជាតិចិនម្នាក់ ត្រូវបានកម្លាំងនគរបាលនាយក ដ្ឋាននគរបាលព្រហ្មទណ្ឌក្រសួងមហាផ្ទៃ សហការជាមួយកម្លាំងនគរបាលខេត្តកំពង់ស្ពឺ ឃាត់ខ្លួន ពាក់ព័ន្ធករណីឃាតកម្មយកសពច្រកក្នុងស្បោងខ្មៅ ដាក់វ៉ាលី យកទៅទម្លាក់ចោល នៅស្រុកភ្នំស្រួច ខេត្តកំពង់ស្ពឺ ។
យោងតាម អគ្គស្នងការនគរបាលជាតិ បានឱ្យដឹងថា ប្រតិបត្តិការនោះបានដឹកនាំដោយ លោកឧត្តមសេនីយ៍ទោ ជាវ វិបុល អនុប្រធាននាយកដ្ឋាននគរបាលព្រហ្មទណ្ឌ ក្រសួងមហាផ្ទៃ និងមានការសម្រួលនីតិវិធី ដោយព្រះរាជអាជ្ញា រាជធានីភ្នំពេញ លោកជំទាវ ព្រះរាជអាជ្ញាខេត្តកំពង់ស្ពឺ នៅថ្ងៃទី២៥ ខែកញ្ញា ឆ្នាំ២០ បានដឹកនាំកម្លាំងសហការ នគរបាលខេត្តកំពង់ស្ពឺ ខណ្ឌសែនសុខ ឃាត់ខ្លួនជនសង្ស័យ។
សូមរំលឹកថា សាកសពបុរសម្នាក់ត្រូវបានគេដាក់ក្នុងវ៉ាលីស យកមកទម្លាក់ចោលនៅចំណុចមាត់ជ្រោះរោងរាងផ្លូវជាតិលេខ៤ ចន្លោះគីឡូម៉ែត្រ១០៤-១០៥ ស្ថិតក្នុងភូមិ៦ ឃុំត្រែងត្រយឹងស្រុកភ្នំស្រួចខេត្តកំពង់ស្ពឺ នៅថ្ងៃទី២៣ ខែកញ្ញា ឆ្នាំ២០២០ វេលាម៉ោង១៤និង២០នាទី។ជនរងគ្រោះមិនត្រូវបានស្គាល់អត្តសញ្ញាណ អាយុប្រហែល៤០ឆ្នាំ សំបុរ ស សង្ស័យជាជនជាតិចិនកាត់សក់ខ្លី ពាក់អាវយឺតសដៃវែងខោប្រផេះជើងវែង។
តាមការបញ្ជាក់ពីប្រជាពលរដ្ឋម្នាក់ដែលបើកម៉ូតូមកដល់ចំណុចកើតហេតុ គាត់បានឃើញរយន្តម៉ាក HILANDER ពណ៌សមិនចាំស្លាកលេខ ចតបែរមុខទៅទិសខាងលិច បើកគូទខាងក្រោយ ដោយមានមនុស្សប្រុសម្នាក់សង្ស័យជាជនជាតិចិនបានទាញវ៉ាលីធំ ពីលើរថយន្តទម្លាក់ចុះទៅមាត់ជ្រោះ(គាត់ឈប់ម៉ូតូមើលពីម្ខាងថ្នល់) រួចបានបើករថយន្តទៅទិសខាងលិចបាត់។ដោយមានការសង្ស័យ គាត់បានចុះទៅមើលវ៉ាលីសនោះ ឃើញថង់ខ្មៅមានជើងមនុស្ស គាត់រត់ទៅប្រាប់ អ្នកភូមិក្បែរផ្ទះគាត់ ហើយរាយការណ៍ជូនទៅសមត្តកិច្ច។
បន្ទាប់ពីសមត្ថកិច្ចពិនិត្យរួចឃើញថាសាកសពមានស្លាកស្នាមលើក្បាលពីក្រោយបែកជាច្រើនកន្លែងនិងស្នាមរយះក្រោមចង្កាសងខាង ៕
