Sancho – OBN Asia

អនាគតរបស់ Sancho ជាមួយ Man Utd កាន់តែស្មុគ្រស្មាញ

Tico — Wed, 21 Aug 2024 09:40:47 +0000

ខ្សែបម្រើស្លាបសញ្ជាតិអង់គ្លេសត្រូវបានចាត់ទុកថាជាចំណែកលើសនៅ Old Trafford កាលពីរដូវកាលមុន បន្ទាប់ពីមិនស្ថិតនៅក្នុងជម្រើសរបស់អ្នកចាត់ការលោក Erik ten Hag។ គាត់បានត្រលប់ទៅកាន់ក្លឹប Borussia Dortmund វិញក្នុងលក្ខខ័ណ្ឌខ្ចីជើង នឹងបានជួយអោយក្លឹបនៅអាឡឺម៉ង់ឡើងទៅកាន់វគ្គផ្តាច់ព្រ័ត្រ Champions League ឆ្នាំ២០២៤ ប៉ុន្តែគាត់មិនត្រូវបានជ្រើសរើសអោយចូលក្រុមជម្រើសជាតិអង់គ្លេសសម្រាប់ព្រឹត្តិការណ៍ Euro ២០២៤ នោះទេ។

ប្រភពដ៏ច្បាស់មួយបានរាយការណ៍ថាកីឡាករ Sancho ត្រឡប់មកកាន់ក្លឹប Manchester United ប៉ុន្តែគាត់បានខកខានការប្រកួតបើករដូវកាល Premier League របស់ United ជាមួយក្លឹប Fulham ដោយសារមានបញ្ហាត្រចៀក។ ការអវត្តមានរបស់គាត់ពីការប្រកួតនោះបានធ្វើឱ្យមានពាក្យចចាមអារ៉ាមមិនឈប់ឈរនៅពេលនិយាយអំពីអនាគតរបស់កីឡាករវ័យ ២៤ឆ្នាំ។

នេះបើយោងតាមការចេញផ្សាយរបស់ The Athletic បានឱ្យដឹងថា Sancho នៅតែអាចបន្តដំណើរទៅមុខទៀត មុនពេលទីផ្សារដោះដូរបិទ។ ក្លឹបយក្សនៅ Ligue 1 Paris Saint-Germain បានចាប់អារម្មណ៍ទៅលើគាត់ផងដែរ។

ក្លឹប Man United ក៏មានអារម្មណ៍ថាក្លឹបអារ៉ាប៊ីសាអូឌីតអាចជាគោលដៅដែលលក់ Sancho បាន ជាមួយនឹងតម្លៃទាមទារ ៤០លានផោន ។ Sancho បានចូលរួមជាមួយបិសាចក្រហមក្នុងឆ្នាំ២០២១ ប៉ុន្តែគាត់ស៊ុតបញ្ចូលទីបានតែ ១២គ្រាប់ប៉ុណ្ណោះ ក្នុងការបង្ហាញខ្លួន ៨៣ដងនៅគ្រប់ការប្រកួតទាំងអស់៕

លោក ten Hag និយាយពី Sancho

Tico — Sat, 17 Aug 2024 05:24:56 +0000

យោងតាមការចេញផ្សាយរបស់លោក Fabrizio Romano បានអោយដឹងថាលោក Erik ten Hag បាននិយាយអំពីកីឡាករ Sancho ដែលមិនស្ថិតនៅក្នុងក្រុមសម្រាប់ការប្រកួតជាមួយ Fulham ថា៖

«ហេតុអ្វីបានជា Sancho មិននៅក្នុងក្រុម? វាគឺជាការសម្រេចចិត្ត ជាមួយនឹងការសមស្របក្នុងការលេង។ ខ្ញុំអាចដាក់កីឡាករបានតែ ២០នាក់ប៉ុណ្ណោះនៅក្នុងក្រុម។ ក្នុងសប្តាហ៍នេះ Jadon មានបញ្ហាត្រចៀក ហើយគាត់មិនទាន់សមក្នុងការលេង ១០០ភាគរយ…. គាត់អាចលេងបាន ប៉ុន្តែពួកយើងសម្រេចចិត្ត។ នោះអាចផ្លាស់ប្តូរ»៕

ក្រោយ Sancho ស៊ុតបាល់ ១១ម៉ែត្រមិនចូលលោក ten Hag និយាយបែបនេះ!

Tico — Sun, 11 Aug 2024 07:43:30 +0000

យោងតាមការចេញផ្សាយរបស់លោក Fabrizio Romano បានអោយដឹងថាលោក Erik ten Hag បាននិយាយអំពីការខកខានការស៊ុតបាល់ ១១ម៉ែត្ររបស់ Sancho ថា៖

«ខ្ញុំមិនមានបញ្ហាអ្វីអំពីគាត់នោះទេ គាត់ជាអ្នកស៊ុតបាល់ ១១ម៉ែត្រដ៏ល្អម្នាក់។ ខ្ញុំច្បាស់ណាស់ថានៅពេលអនាគតគាត់នឹងអាចស៊ុតបាល់ ១១ម៉ែត្របានសម្រេច»៕

អនាគតរបស់កីឡាករ Sancho នៅតែស្រពិចស្រពិល

Tico — Thu, 08 Aug 2024 05:43:55 +0000

យោងតាមការចេញផ្សាយរបស់លោក Fabrizio Romano បានអោយដឹងថាក្លឹប Manchester Uited មិនទាន់ទទួលបានសំណើរណាមួយពីក្លឹប PSG សម្រាប់កីឡាករ Jodan Sancho នោះទេ ដោយវាគ្រាន់តែជាការចាប់អារម្មណ៍ប៉ុណ្ណោះ។

ក្នុងនោះត្រូវបានគេដឹងថាអនាគតកីឡាករ Sancho នៅតែបើកចំហរ ហើយគាត់អាចនឹងចាកចេញពីក្លឹប Man Utd នៅក្នុងសប្តាហ៍ចុងក្រោយ ប្រសិនជាទទួលបានសំណើរដែលសាកសមមួយ។ ការសម្រេចចិត្ត គឺអាស្រ័យទៅលើក្លឹប និងអ្នកចាត់ការលោក Erik ten Hag៕

ទីបំផុត ten Hag និង Sancho ត្រូវគ្នាវិញហើយ

Tico — Sat, 13 Jul 2024 10:55:36 +0000

យោងតាមការចេញផ្សាយរបស់លោក Fabrizio Romano បានអោយដឹងថាកីឡាករ Jadon Sancho បានធ្វើការជួបពិភាក្សាដោយផ្ទាល់ជាមួយនឹងលោក Erik ten Hag នៅសប្តាហ៍នេះ ហើយពួកគេក៏បានធ្វើការបញ្ជាក់យ៉ាងច្បាស់អំពីស្ថានភាពកន្លងមក។

ទាំង ten Hag និង Sancho បានយល់ព្រមដកថយម្នាក់មួយជំហ៊ាន និងធ្វើការបន្តទៅមុខទៀត។ កីឡាករ Jadon Sancho នឹងមានវត្តមានសម្រាប់ការប្រកួត Pre-Season។ គាត់បានត្រលប់មកធ្វើការហ្វឹកហាត់វិញហើយ៕

ក្លឹបមួយនៅអ៊ីតាលីកំពុងចង់បាន Sancho

Tico — Fri, 12 Jul 2024 06:51:48 +0000

ក្លឹប Juventus កំពុងខិតខំប្រឹងប្រែងក្នុងការចុះហត្ថលេខាលើខ្សែបម្រើស្លាបរបស់ក្លឹប Manchester United កីឡាករ Jadon Sancho ខណៈកីឡាកររូបនេះក៏បង្ហាញការចាប់អារម្មណ៍ក្នុងការផ្ទេរមួយនេះដូចគ្នា។ នេះបើយោងតាមការចេញផ្សាយរបស់ TEAMtalk បានអោយដឹងថា ខ្សែបម្រើវ័យ ២៤ឆ្នាំដែលមានបញ្ហាជាមួយនឹងអ្នកចាត់ការក្លឹប Manchester United លោក Erik ten Hag កំពុងស្វែងរកការចាប់ផ្តើមអាជីពថ្មីរបស់ខ្លួននៅក្លឹបយក្សអ៊ីតាលី។

កីឡាករ Sancho ដែលបានចំណាយពេលកាលពីរដូវកាលមុន ក្នុងការលេងខ្ចីជើងនៅក្លឹប Borussia Dortmund បានទាក់ទាញចំណាប់អារម្មណ៍របស់ក្លឹបជាច្រើននៅតំបន់អឺរ៉ុប ក្រោយគាត់បានជួយក្លឹបនៅអាឡឺម៉ងឡើងដល់វគ្គផ្តាច់ព្រ័ត្រ Champions League។ ទោះបីជាយ៉ាងណាក៏ដោយ អនាគតរបស់គាត់ហាក់មិនទាន់មានភាពច្បាស់លាស់នៅ Old Trafford ដោយសារតែទំនាក់ទំនងដ៏តឹងតែងរវាងគាត់ជាមួយនឹងលោក Erik ten Hag។

ក្លឹប Manchester United បានទាមទារតម្លៃ ៤០លានផោនសម្រាប់កីឡាករសញ្ជាតិអង់គ្លេសរូបនេះ ដែលវាជាតួរលេខយ៉ាងខ្ពស់សម្រាប់ក្លឹប Dortmund ក្នុងការផ្ទេរយក។ ផ្ទុយទៅវិញក្លឹប Juventus អាចនឹងត្រូវលក់កីឡាករមួយចំនួនចេញជាមុនសិន ប្រសិនជាក្លឹបពិតជាចង់ផ្ទេរយកកីឡាករ Sancho មែននោះទេ៕

ទីបំផុតក្លឹប Man Utd ព្រមទម្លាក់តម្លៃខ្លួនរបស់ Sancho

Tico — Sat, 15 Jun 2024 07:03:38 +0000

ក្លឹប Manchester United ត្រៀមក្នុងការទម្លាក់តម្លៃខ្លួនរបស់កីឡាករ Jadon Sancho នៅរដូវក្តៅនេះ ដែលមានន័យថាក្លឹបដែលចង់បានគាត់អាចនឹងបើការចរចាផ្ទេរមួយនេះបាន។

នេះបើយោងតាមការចេញផ្សាយរបស់ BBC បានអោយដឹងថាក្លឹប United បានទម្លាក់តម្លៃផ្ទេររបស់កីឡាករ Jadon Sancho ពី ៥៥លានផោន មកត្រឹម ៤០លានផោន ដែលបញ្ចុះរហូតដល់ ១៥លានផោន។

កីឡាករ Sancho ដែលបានឈានដល់វគ្គផ្តាច់ព្រ័ត្រនៃក្របខ័ណ្ឌ Champions League ឆ្នាំ២០២៣-២៤ ខណៈពេលកំពុងខ្ចីជើងនៅ Borussia Dortmund គឺជាគោលដៅសំខាន់មួយរបស់ក្លឹប Bundesliga ៕

Man Utd នៅតែមានក្តីរំពឹងខ្ពស់អំពី Sancho

Tico — Tue, 11 Jun 2024 05:55:40 +0000

យោងតាមការចេញផ្សាយរបស់លោក Fabrizio Romano បានអោយដឹងថាក្លឹប Manchester United ជឿជាក់ថាអាចមានក្លឹបជាច្រើនទៀតដែលចាប់អារម្មណ៍ចង់ចុះហត្ថលេខាយកកីឡាករ Jadon Sancho មិនមែនមានតែក្លឹប Borussia Dortmund តែមួយប៉ុណ្ណោះទេ។

ជម្រើសដែលរំពឹងទុកនោះ ក៏មាននៅប្រទេសផ្សេងទៀតផងដែរ ខណៈពេលដែលក្លឹប Manchester United ស្វែងរកនៅឱកាសទាំងអស់ មុននឹងធ្វើការសម្រេចចិត្តជ្រើសរើសយកជម្រើសដ៏ល្អមួយ។ តម្លៃខ្លួនរបស់កីឡាករ Sancho ប្រមាណ ៤០លានផោន៕

Dortmund ចង់ផ្ទេរយកកីឡាករ ៣រូបនេះ

Tico — Mon, 03 Jun 2024 05:28:29 +0000

យោងតាមការចេញផ្សាយរបស់លោក Fabrizio Romano បានអោយដឹងក្លឹប Borussia Dortmund នឹងធ្វើការលើគោលដៅផ្ទេរសម្រាប់រដូវកាលក្រោយនៅសប្តាហ៍ខាងមុខ ដែលក្នុងនោះមានកីឡាករ Jadon Sancho និង Ian Maatsen។

ក្លឹប Borussia Dortmund ក៏នឹងព្យាយាមបន្តទៅមុខទៀត បន្ទាប់ពីការពិភាក្សាដំបូងរបស់ពួកគេជាមួយនឹងកីឡាករ Serhou Guirassy៕

កីឡាករ Jadon Sancho បង្ហាញជំហរមិនត្រលប់ទៅ Man Utd

Tico — Mon, 06 May 2024 10:04:04 +0000

យោងតាមការចេញផ្សាយរបស់លោក Patrick Berger អ្នកសារព័ត៌មាននៅ Sky Sports បានអោយដឹងថាកីឡាករ Jadon Sancho ដែលកំពុងលេងខ្ចីជើងនៅក្លឹប Dortmund ត្រូវបានគេរាយការណ៍ថាមិនចង់បន្តស្នាក់នៅ Old Trafford ទៀតនោះទេ ដោយមិនខ្វល់ពីរឿងអនាគតរបស់លោក Erik ten Hag ។

ក្លឹប Borussia Dortmund ចង់រក្សាទុកកីឡាករ Sancho លើសពីរដូវកាលនេះ ប៉ុន្តែពួកគេមិនទំនងចុះហត្ថលេខាលើគាត់ជាអចិន្ត្រៃយ៍ទេ ខណៈដែលពួកគេកំពុងស្វែងរកជម្រើសសម្រាប់ការខ្ចីជើងទីពីរជាមួយនឹងកាតព្វកិច្ចទិញមុនរដូវកាល ២០២៥-២៦៕