Android – OBN Asia

តោះមកស្គាល់ទីតាំងទាំង ៥កន្លែង ដែលយើងអាចទៅធ្វើលិខិតឆ្លងដែនបាន

obnasia — Fri, 28 Apr 2023 01:25:27 +0000

ភ្នំពេញ៖ ទីតាំង អាសយដ្ឋាន និងលេខទំនាក់ទំនងធ្វើលិខិតឆ្លងដែន

១- នាយកដ្ឋានលិខិតឆ្លងដែន អាសយដ្ឋាន ភូមិតាង៉ូវ សង្កាត់និរោធ ខណ្ឌច្បារអំពៅ រាជធានីភ្នំពេញ

ទូរស័ព្ទទំនាក់ទំនង ០៩៥ ២៧៩ ៥០០

២- សាខាលិខិតឆ្លងដែនប្រចាំខេត្តបាត់ដំបង អាសយដ្ឋាន ដីឡូតិ៍ លេខ F29 ភូមិជំនីក ឃុំអន្លង់វិល ស្រុកសង្កែ ខេត្តបាត់ដំបង ទូរស័ព្ទទំនាក់ទំនង ០៧០៨៦៨៦៨៨

៣- សាខាលិខិតឆ្លងដែនប្រចាំខេត្តបន្ទាយមានជ័យ អាសយដ្ឋាន ភូមិគីឡូលេខ៤ សង្កាត់ផ្សារកណ្តាល ក្រុងប៉ោយប៉ែត ខេត្ត បន្ទាយមានជ័យ ទូរស័ព្ទទំនាក់ទំនង ០៦១ ២១១១៩៨

៤- សាខាលិខិតឆ្លងដែនប្រចាំខេត្តកោះកុង អាសយដ្ឋាន ភូមិ៤ សង្កាត់ដងទង់ ក្រុងខេមរភូមិន្ទ ខេត្តកោះកុង

ទូរស័ព្ទ ទំនាក់ទំនង ០៨១ ៨៤៤៨១២

៥- ទីស្នាក់ការផ្តល់លិខិតឆ្លងដែនធម្មតាប្រចាំផ្សារអ៊ីអនមល សែនសុខ អគារផ្សារទំនើបអ៊ីអនម៉លសែនសុខ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ទូរស័ព្ទទំនាក់ទំនង ០១១ ៥៨២២៧៧

សម្រាប់ព័ត៌មានបន្ថែម សូមលោកអ្នក Download កម្មវិធី GDI eServices តាម iOs ឬ Android ឬទាក់ទងមកមន្ត្រីប្រចាំការសេវាកម្មអត្តសញ្ញាណកម្ម និងប្រតិកម្មរហ័ស រៀងរាល់ម៉ោងធ្វើការ ពីថ្ងៃច័ន្ទ ដល់សុក្រ តាមរយៈលេខទូរស័ព្ទ ១២៧១/ ០១៧ ៨៩៨ ៩១៥៕

ប្រភព៖ ឧត្តមសេនីយ៍ឯក សាយ ម៉េងឈាង

អ្នកដែលមានកម្មវិធីមួយនេះក្នុងទូរស័ព្ទសូមប្រយ័ត្ន! ព្រោះក្រុមហ៊ុនកំពុងយកទិន្និន័យទីតាំងជាក់លាក់របស់អ្នកដាក់លក់ហើយ

obnasia — Tue, 07 Dec 2021 06:58:28 +0000

បរទេស៖ Life360 គឺជាកម្មវិធីតាមដានដែលអាចដំឡើងបាននៅលើទូរសព្ទស្មាតហ្វូន ដែលមានប្រព័ន្ធប្រតិបត្តិការ iPhone និង Android ហើយដែលអ្នកប្រើប្រាស់រាប់លាននាក់ចូលចិត្តប្រើដើម្បីអាចឱ្យសមាជិកគ្រួសារដឹងពីទីតាំងរបស់ពួកគេទៅវិញទៅមក។

កម្មវិធី Life360 ដែលមានអ្នកប្រើប្រាស់ចំនួនប្រមាណ ៣៣លាននាក់ទូទាំងពិភពលោកត្រូវបានរកឃើញកាលពីពេលថ្មីៗនេះថា បានលក់ទិន្នន័យទីតាំងជាក់លាក់របស់អ្នកប្រើប្រាស់ដែលរាប់បញ្ចូលទាំងទិន្នន័យទីតាំងរបស់កុមារផងនោះទៅឱ្យក្រុមហ៊ុនប្រមូលនិងចងក្រងទិន្នន័យទីតាំង ដែលបន្ទាប់មកពួកគេបានលក់ទិន្នន័យទាំងនោះទៅឱ្យក្រុមហ៊ុនជាច្រើនទៀត។ ទោះបីជា លក្ខខណ្ឌក្នុងការប្រើប្រាស់របស់កម្មវិធី Life360 បញ្ជាក់ថា “ទិន្នន័យឯកជនភាពរបស់អ្នកប្រើប្រាស់នឹងត្រូវបានលក់” ប៉ុន្តែអ្នកប្រើប្រាស់ភាគច្រើនប្រហែលជាមិនបានអានអំពីលក្ខខណ្ឌ ឬមិនបានដឹងអំពីរបៀបដែលទិន្នន័យត្រូវបានចែកចាយបន្ទាប់ពីវាផ្តល់ឱ្យទៅឈ្មួញកណ្តាល។

អតីតបុគ្គលិក Life360 ពីរនាក់បាននិយាយថា Life360 គឺជាប្រភពទិន្នន័យដ៏ធំបំផុតមួយនៅក្នុងការលក់ទិញទិន្នន័យទីតាំង ហើយពួកគេបានបង្ហាញពីការព្រួយបារម្ភចំពោះរបៀបដែលទិន្នន័យត្រូវបានប្រើប្រាស់ និងកង្វះខាតក្នុងការការពារទិន្នន័យកុំឱ្យធ្លាក់ទៅលើដៃជនខិលខូច។ ជាងនេះទៅទៀតពួកគេក៏បានអះអាងផងដែរថា Life360 មិនមានការប្រុងប្រយ័ត្នដើម្បីធានាថា ប្រវត្តិទីតាំងមិនអាចត្រូវបានគេតាមដានត្រឡប់ទៅបុគ្គលដើមវិញនោះទេ។

ដើម្បីសុវត្ថិភាពក្នុងការប្រើប្រាស់ឧបករណ៍បច្ចេកវិទ្យា អ្នកប្រើប្រាស់គួរតែចៀសវាងបញ្ចូលកម្មវិធីដែលមិនត្រូវការចាំបាច់ ជាពិសេសកម្មវិធីណាដែលទាមទារឱ្យមានការឯកភាពជាមួយនឹងការតាមដានទីតាំងនោះ។ ជាឧទាហរណ៍ ក្នុងការប្រើប្រាស់កម្មវិធីនេះលោកអ្នកអាចដឹងពីកន្លែងដែលសមាជិកក្រុមគ្រួសាររបស់អ្នកនៅ ប៉ុន្តែអ្នកដែលបានទិញព័ត៌មាន ក៏អាចដឹងពីទីតាំងទាំងនោះបានដែរ៕

ប្រភព៖ នាយកដ្ឋានប្រឆាំងបទល្មើសបច្ចេកវិទ្យា

អ្នកប្រើប្រាស់ទូរស័ព្ទគួរយល់ដឹងអំពីវិធីមួយនេះ ដើម្បីកុំអោយ Track ពីទីតាំង និងទិន្នន័យរបស់ខ្លួន

obnasia — Tue, 16 Nov 2021 10:26:48 +0000

ភ្នំពេញ៖ ការទាញយកនិងលក់ទិន្នន័យទីតាំងរបស់អ្នកប្រើប្រាស់គឺជាពាណិជ្ជកម្មដ៏ធំមួយដែលក្រុមហ៊ុនអាចរកចំណូលបានដល់ទៅរាប់ពាន់លានដុល្លារក្នុងមួយឆ្នាំ ដោយពួកគេលក់ទិន្នន័យនេះទៅឱ្យក្រុមហ៊ុនទី៣ ដើម្បីផ្សព្វផ្សាយពាណិជ្ជកម្ម និងស្វែងយល់អំពីអាកប្បកិរិយារបស់អតិថិជន ថែមទាំងអាចឱ្យរដ្ឋាភិបាលតាមដានបុគ្គលណាមួយនោះបានទៀតផង។ ក្រុមអ្នកស្រាវជ្រាវបានធ្វើការព្រមានកាលពីឆ្នាំមុន ឱ្យអ្នកប្រើប្រាស់មានការប្រុងប្រយ័ត្នជាមួយនឹងមុខងារតាមដានទីតាំងរបស់ទូរសព្ទដែលមានប្រព័ន្ធប្រតិបត្តិការ Android របស់ក្រុមហ៊ុន Google ព្រោះក្រុមហ៊ុននេះតែងតែព្យាយាមទាញយកទីតាំងនិងទិន្នន័យរបស់អ្នកប្រើប្រាស់ ដ៏ច្រើនលើសលប់បើប្រៀបធៀបទៅនឹង ទូរសព្ទដែលមានប្រព័ន្ធប្រតិបត្តិការ iOS របស់ក្រុមហ៊ុន Apple។

ជាងនេះទៅទៀត ពួកគេក៏បានរកឃើញផងដែរថា ក្រុមហ៊ុន Google នៅតែអាចបន្តទាញយកទីតាំងរបស់អ្នកប្រើប្រាស់ទោះបីជាពួកគេបានបិទការតាមដានទីតាំង ហើយថែមទាំងបានបង្កប់មុខងារសម្រាប់បិទទីតាំងយ៉ាងសម្ងាត់ ដើម្បីចៀសវាងអ្នកប្រើប្រាស់អាចចូលទៅបិទមុខងារនេះបាន។

ទោះបីជាទូរសព្ទដែលមានប្រព័ន្ធប្រតិបត្តិការ iOS ពុំមានការតាមបានច្រើនក្ដី លោកអ្នកគួរតែបិទមុខងារតាមដាន ដោយចូលទៅក្នុង Settings> Privacy> Tracking ដើម្បីការពារទិន្នន័យឯកជនភាព។ ជាងនេះទៅទៀតលោកអ្នកអាចបិទមុខងារតាមដានទីតាំងប្រសិនបើលោកអ្នកពុំចាំបាច់ត្រូវការប្រើប្រាស់ ឬកំណត់ឱ្យមានការតាមដានតែក្នុងពេលដែលប្រើកម្មវិធីនោះ ដោយចូលទៅក្នុង Settings> Privacy> Location Services ៕

ប្រភព៖ អគ្គស្នងការដ្ឋាននគរបាលជាតិ- General Commissariat of National Police

WhatsApp នឹងបន្ថែមមុខងារ ដែលអាចផ្ទេរទិន្នន័យ រវាងទូរស័ព្ទមានប្រព័ន្ធ iOS និង Android

obnasia — Thu, 12 Aug 2021 02:56:31 +0000

នាយកដ្ឋានប្រឆាំងបទល្មើសបច្ចេកវិទ្យា បានឲ្យដឹងថា នៅពេលដែលអ្នកប្រើប្រាស់ ចង់ធ្វើការផ្លាស់ប្ដូរទូរសព្ទ ពីប្រព័ន្ធប្រតិបត្តិការមួយ ទៅប្រព័ន្ធប្រតិបត្តិការមួយទៀត ឧបសគ្គដ៏ធំមួយក្នុងការផ្លាស់ប្ដូរនោះគឺ ពួកគេមិនអាចផ្ទេរទិន្នន័យរបស់កម្មវិធី WhatsApp ពីទូរសព្ទចាស់។

ប៉ុន្តែកាលពីម្សិលមិញនេះក្រុមហ៊ុន WhatsApp បានប្រកាសថា នឹងដាក់ឱ្យប្រើប្រាស់មុខងារ ដែលអាចឱ្យអ្នកប្រើប្រាស់ផ្ទេរទិន្នន័យ រវាងទូរសព្ទដែលមាន ប្រព័ន្ធប្រតិបត្តិការខុសគ្នា។

ជាដំបូងក្រុមហ៊ុននឹងបើកឱ្យ ប្រើមុខងារនេះជាមួយនឹងទូរសព្ទ ដែលមានប្រព័ន្ធប្រតិបត្តិការ Android 10 ឬថ្មីជាងនេះ ដើម្បីផ្ទេរទិន្នន័យពីទូរសព្ទ iPhone មានដូចជា សារ រូបភាព វីដេអូ និង សារ memo។ សម្រាប់អ្នកប្រើប្រាស់ ដែលចង់ប្ដូរមកប្រើទូរសព្ទ iPhone ក្រុមហ៊ុនមិនបានបញ្ជាក់ អំពីពេលវេលាដែលនឹងដាក់ ឱ្យប្រើប្រាស់មុខងារនេះឱ្យ បានច្បាស់លាស់នៅឡើយទេ ៕

កម្មវិធីកម្ចាត់មេរោគ Google Play Protect មិនបានការពារទូរស័ព្ទ របស់លោកអ្នកបានល្អទេ

obnasia — Fri, 30 Jul 2021 06:02:27 +0000

កម្មវិធី Google Play Protect ត្រូវបានក្រុមហ៊ុន Google ដាក់ឱ្យប្រើប្រាស់កាលពីឆ្នាំ ២០១៧ កន្លងទៅសម្រាប់ទូរស័ព្ទ ដែលមានប្រព័ន្ធប្រតិបត្តិការ Android ដើម្បីការពារពីកម្មវិធីមេរោគ ហើយនាពេលបច្ចុប្បន្ន កម្មវិធីនេះត្រូវបានដាក់ឱ្យប្រើប្រាស់ នៅក្នុងទូរសព្ទចំនួនប្រមាណ ២.៥ពាន់លានគ្រឿង។ ប៉ុន្តែបើតាមការរកឃើញរបស់ក្រុមហ៊ុន AV-TEST កាលពីពេលថ្មីៗនេះបានបង្ហាញថា Google Play Protect មានភាពអន់ខ្សោយក្នុងការស្វែងរក មេរោគបើប្រៀបធៀបទៅនឹង កម្មវិធីផ្សេងៗទៀត។

ក្នុងរយៈពេល ៦ខែ ចាប់តាំងពីខែមករា ដល់ខែមិថុនា ក្រុមហ៊ុន AV-TEST បានធ្វើការសាកល្បង ស្វែងរកកម្មវិធីមេរោគចំនួនប្រមាណ ២ម៉ឺន ដោយប្រើកម្មវិធីកម្ចាត់មេរោគល្បីៗជាច្រើន។ ជាលទ្ធផល Google Play Protect អាចរកឃើញមេរោគបានតែចំនួន ២ភាគ៣ ឬប្រហែល ៦៨% នៃចំនួនមេរោគទាំងអស់ ដែលធ្វើឱ្យកម្មវិធីនេះជាប់ ចំណាត់ថ្នាក់ចុងក្រោយគេបំផុត។

ក្នុងចំណោមកម្មវិធីទាំង១៥ មានកម្មវិធីចំនួន៥ អាចរកឃើញមេរោគបានដោយជោគជ័យ ១០០% ក្នុងនោះមាន Bitdefender, G DATA, McAfee, NortonLifeLock និង Trend Micro។

គួរបញ្ជាក់ផងដែរថា កាលពីឆ្នាំកន្លងទៅក្រុមហ៊ុន Google ក៏បានខិតខំ ព្យាយាមបង្កើនប្រសិទ្ធភាពកម្មវិធី កម្ចាត់មេរោគដោយបានបង្កើត App Defense Alliance ជាមួយនឹងក្រុមហ៊ុន ESET, Lookout និង Zimperium ផងដែរ ៕ ប្រភព៖ នាយកដ្ឋានប្រឆាំងបទល្មើសបច្ចេកវិទ្យា

ប្រយ័ត្ន! ជនខិលខូចកំពុងតែប្រើ URL shortener ដើម្បីវាយលុកជាមួយកម្មវិធីមេរោគ

obnasia — Fri, 23 Jul 2021 02:48:49 +0000

កាលពីពេលថ្មីៗនេះ ក្រុមអ្នកស្រាវជ្រាវបានរកឃើញ ពីការកើនឡើងក្នុងការប្រើប្រាស់ URL shortener ដើម្បីចែកចាយកម្មវិធីមេរោគសម្រាប់ ទូរសព្ទដែលមានប្រព័ន្ធប្រតិបត្តិការ iOS និង Android។

URL shortener គឺជាវិធីសាស្រ្តបង្រួញ URL ដែលជាតំណភ្ជាប់របស់គេហទំព័រ ដើម្បីងាយស្រួលក្នុងការចម្លង ឬដើម្បីអាចផ្ញើតាមរយៈសារដែលមាន កំណត់តួអក្សរឱ្យបានខ្លីបំផុតនោះ។
នៅពេលដែលអាសយដ្ឋាន របស់គេហទំព័រត្រូវបានបង្រួញ អ្នកប្រើប្រាស់នឹងពុំអាចមើលឃើញ ឈ្មោះរបស់គេហទំព័រដើមទាំងស្រុងនោះទេ ដែលនេះអាចឱ្យជនខិលខូចបន្លំ ផ្ញើតំណភ្ជាប់ទៅគេហទំព័រ ដែលមានផ្ទុកមេរោគបានយ៉ាងងាយស្រួល។

ជនខិលខូចបានប្រើវិធីនេះ ដើម្បីបញ្ចូលព្រឹត្តិការណ៍ ទៅក្នុងប្រតិទិនរបស់ទូរសព្ទ ដើម្បីឱ្យអ្នកប្រើប្រាស់ចុចនៅលើតំណភ្ជាប់ ដែលមានផ្សព្វផ្សាយពាណិជ្ជកម្ម កម្មវិធីមេរោគ ឬរូបភាពអាសអាភាស។ សម្រាប់ទូរសព្ទដែលមានប្រព័ន្ធប្រតិបត្តិការ Android វិញ ជនខិលខូចអាចបន្លំឱ្យអ្នកប្រើប្រាស់ បញ្ចូលកម្មវិធីជាច្រើនទៀត ដោយសារតែទូរសព្ទប្រភេទនេះ អាចបញ្ចូលកម្មវិធីពីប្រភពផ្សេងៗបាន។

ជាឧទាហរណ៍ពួកគេបានបង្ហាញ អ្នកប្រើប្រាស់នូវកម្មវិធីដែលមានឈ្មោះ “adBLOCK” ប៉ុន្តែតាមការពិតកម្មវិធីនេះ គឺជាកម្មវិធីដែលពួកគេចែកចាយ ដើម្បីផ្សព្វផ្សាយសារបង្ខិតបង្ខំ អ្នកប្រើប្រាស់ទាក់ទងទៅនឹង កម្មវិធីមេរោគទៅវិញ។

ដូច្នេះដើម្បីសុវត្ថិភាពក្នុងការប្រាស់ទូរសព្ទ នាយកដ្ឋានប្រឆាំងបទល្មើសបច្ចេកវិទ្យា សូមឱ្យអ្នកប្រើប្រាស់មានការប្រុងប្រយ័ត្ន នៅពេលដែលលោកអ្នកទទួល បានសារណាមួយនោះ។ សូមលោកអ្នកកុំចុច នៅលើតំណភ្ជាប់ដែលមាននៅ ក្នុងសារដែលមិនមានប្រភពច្បាស់លាស់ ដើម្បីចៀសវាងពីការទាញយកកម្មវិធីមេរោគ ឬការលួចយកទិន្នន័យផ្សេងៗ៕ ប្រភព៖ នាយកដ្ឋានប្រឆាំងបទល្មើសបច្ចេកវិទ្យា

នោះ! លោកអ្នកអាចប្រើ កម្មវិធីរបស់ទូរស័ព្ទ Android ជាមួយនឹង Windows 11 បាន

obnasia — Fri, 25 Jun 2021 06:47:08 +0000

នាយកដ្ឋានប្រឆាំងបទល្មើសបច្ចេកវិទ្យាបានឲ្យដឹងថា កាលពីម្សិលមិញនេះក្រុមហ៊ុន Microsoft បានធ្វើការផ្សព្វផ្សាយអំពីកម្មវិធី ប្រព័ន្ធប្រតិបត្តិការថ្មីរបស់ពួកគេ ដែលគេឱ្យឈ្មោះថា Windows 11។

សម្រាប់កម្មវិធីថ្មីនេះក្រុមហ៊ុន បានធ្វើការកែសម្រួលកម្មវិធី និងមុខងារមួយចំនួន ដើម្បីប្រកួតប្រជែងជាមួយ នឹងកម្មវិធីប្រព័ន្ធប្រតិបត្តិការ macOS របស់ក្រុមហ៊ុន Apple។

ជាឧទាហរណ៍ក្រុមហ៊ុនបានរៀបចំ ប្លង់រចនាដែលស្រដៀងគ្នាទៅនឹង macOS ហើយបានបន្ថែមមុខងារ Snap Groups ដែលអាចឱ្យអ្នកប្រើប្រាស់ដាក់បញ្ចូល កម្មវិធីមួយចំនួនជាក្រុមនៅលើ taskbar។ ជាងនេះទៅទៀត ក្រុមហ៊ុនក៏បានសហការជាមួយនឹងក្រុមហ៊ុន Amazon ដែលអាចឱ្យអ្នកប្រើប្រាស់ទាញយក កម្មវិធីជាច្រើនតាមរយៈក្រុមហ៊ុន Amazon។

ប៉ុន្តែអ្វីដែលមានការភ្ញាក់ផ្អើលនោះ គឺក្រុមហ៊ុនបានធ្វើការកែសម្រួល ដើម្បីឱ្យអ្នកប្រើប្រាស់អាចប្រើ កម្មវិធីសម្រាប់ប្រព័ន្ធប្រតិបត្តិការ Android នៅលើកុំព្យូទ័រដែលមាន ប្រព័ន្ធប្រតិបត្តិការថ្មីនេះបាន។ ភាពជោគជ័យនេះក៏ដោយសារតែបច្ចេកវិទ្យា Intel Bridge អាចធ្វើការផ្លាស់ប្ដូរការកំណត់ផ្សេងៗ សម្រាប់កុំព្យូទ័រដោយស្វ័យប្រវត្តិ ដោយមិនចាំបាច់បញ្ចូលកម្មវិធីជំនួយដទៃទៀត ដែលនេះគឺវាស្រដៀងគ្នាទៅនឹង បច្ចេកវិទ្យាដែលមាននៅក្នុងបន្ទះឈីប M1 របស់ក្រុមហ៊ុន Apple។

គួរបញ្ជាក់ដែរថា ទោះបីជាបច្ចេកវិទ្យា Intel Bridge ត្រូវបានបង្កើតឡើងដោយក្រុមហ៊ុន Intel ក្ដីប៉ុន្តែវាក៏អាចដំណើរការជាមួយនឹង បន្ទះឈីបដែលផលិតដោយក្រុមហ៊ុន AMD ផងដែរ ៕

សូមប្រុងប្រយ័ត្នជាមួយនឹង ភាពចន្លោះប្រហោងរបស់មុខងារ Facebook Messenger Rooms

obnasia — Tue, 15 Jun 2021 04:05:06 +0000

នាយកដ្ឋានប្រឆាំងបទល្មើសបច្ចេកវិទ្យា បានឲ្យដឹងថា កាលពីពេលថ្មីៗនេះអ្នកស្រាវជ្រាវផ្នែក សុវត្ថិភាពបច្ចេកវិទ្យាបានរកឃើញពី ភាពចន្លោះប្រហោងរបស់មុខងារ Messenger Rooms ដែលអាចឱ្យជនខិលខូចចូល ទៅមើលរូបភាពនៅក្នុងទូរសព្ទដែលប្រើប្រព័ន្ធប្រតិបត្តិការ Android បើទោះបីជាវាមានប្រើប្រព័ន្ធ សុវត្ថិភាពការពារដូចជាលេខសម្ងាត់ ឬប្រព័ន្ធជីវមាត្រក៏ដោយ ប្រសិនបើពួកគេកំពុងតែកាន់កាប់ទូរសព្ទនេះ។

ដើម្បីអាចចូលទៅក្នុង ទូរសព្ទរបស់ជនរងគ្រោះបាន ជាដំបូងជនខិលខូចត្រូវធ្វើការ ជូនដំណឹងឱ្យចូលរួមកម្មវិធី Messenger Rooms។ ប៉ុន្តែនៅពេលដែលពួកគេទទួលបាន ការតេចូលហើយនោះ ពួកគេអាចចុចនៅលើប៊ូតុងផ្ញើសារ ដែលអាចឱ្យពួកគេចូលទៅមើលរូបភាព និងវីដេអូទាំងអស់ដែលមាននៅក្នុងទូរសព្ទ។

បើទោះបីជាការជ្រៀតចូលនេះ អាចពិបាកនឹងកើតឡើងដោយសារតែ វាតម្រូវឱ្យជនខិលខូចកាន់កាប់ ទូរសព្ទរបស់លោកអ្នកក្ដី ប៉ុន្តែប្រសិនបើជនខិលខូចគឺជាអ្នកធ្វើការ ឬជាអ្នករស់នៅជាមួយលោកអ្នកផងនោះ ពួកគេអាចប្រើវិធីនេះដើម្បីចូលទៅមើលរូបភាពឬវីដេអូដែលមាន នៅក្នុងទូរសព្ទរបស់លោកអ្នកបាន។ ដូច្នេះដើម្បីសុវត្ថិភាពក្នុង ការប្រើប្រាស់ទូរសព្ទដែលមានប្រព័ន្ធប្រតិបត្តិការ Android លោកអ្នកគួរតែធ្វើបច្ចុប្បន្នភាពកម្មវិធី Messenger ឱ្យបានឆាប់រហ័ស ៕

កាន់តែងាយស្រួល! ក្រសួងប្រៃសណីយ៍ ដាក់ឲ្យដំណេីរការសាកល្បង កម្មវិធីបំប្លែងសំឡេងទៅជាអត្ថបទ

obnasia — Sat, 12 Jun 2021 02:48:05 +0000

ភ្នំពេញ៖ កាន់តែងាយស្រួល និងចំណេញពេលវេលបានច្រេីនជាងមុន ជាមួយនឹងការដាក់ឱ្យដំណើរការសាកល្បងកម្មវិធីបំប្លែងសំឡេងទៅជាអត្ថបទដែលប្រើប្រាស់បច្ចេកវិទ្យា បញ្ញាសិប្បនិម្មិត។

យោងតាមសេចក្តីជូនដំណឹង របស់ក្រសួងប្រៃសណីយ៍ និងទូរគមនាគមន៍កាលពីថ្ងៃទី១១ មិថុនាបានបញ្ជាក់ថា តាមរយៈ ការស្រាវជ្រាវនិងអភិវឌ្ឍលើបច្ចេកវិទ្យាភាសា បណ្ឌិត្យសភាបច្ចេកវិទ្យាឌីជីថលកម្ពុជា បានបង្កើត «កម្មវិធីបំប្លែង សំឡេងទៅជាអត្ថបទ – Khmer Automatic Speech Recognition – Khmer ASR » ដែលប្រើប្រាស់បច្ចេកវិទ្យា បញ្ញាសិប្បនិម្មិត ( Artificial intelligence (https://en.wikipedia.org/wiki/Artificial_intelligence) )។

កម្មវិធីនេះអាចប្រើប្រាស់ក្នុងទូរសព្ទដៃតាមប្រព័ន្ធប្រតិបត្តិការ Android និង iOS ក្នុងការបំប្លែងសំឡេង និយាយដោយផ្ទាល់ជាភាសាខ្មែរ ឬពីឯកសារសំឡេងក្នុងទម្រង់ជា WAV, Mp3, M4a និង OGG ទៅជាអត្ថបទភាសាខ្មែរដោយស្វ័យប្រវត្តិ ដើម្បីជាជំនួយដល់ការសរសេរអត្ថបទឱ្យ កាន់តែឆាប់រហ័ស និងងាយស្រួល។ នៅដំណាក់កាលនេះ កម្រិតបំប្លែងត្រឹមត្រូវ (Accuracy) មានប្រមាណ ៩០%។

ក្រសួងប្រៃសណីយ៍ និងទូរគមនាគមន៍ សូមណែនាំក៏ដូចជាលើកទឹកចិត្តឱ្យថ្នាក់ដឹកនាំ មន្ត្រីរាជការ បុគ្គលិក សិស្ស និស្សិត និងប្រជាពលរដ្ឋទាំងអស់ដំឡើង «កម្មវិធីបំប្លែងសំឡេងទៅជាអត្ថបទ (Khmer ASR)» ដើម្បីជាជំនួយដល់កិច្ចការសរសេរប្រចាំថ្ងៃដោយស្កេន QR Code ខាងក្រោម។

ដើម្បីធ្វើឱ្យកម្មវិធីនេះ កាន់តែប្រសើរ ក្រសួងរីករាយនឹងទទួលមតិយោបល់ពីសាធារណជន ដោយចុចលើពាក្យ «មតិត្រឡប់»នៅក្នុងកម្មវិធី។ សម្រាប់ព័ត៌មានបន្ថែមពាក់ព័ន្ធ នឹងបច្ចេកទេសនៃការប្រើប្រាស់នេះ សាធារណជនអាចចូលទៅគេហទំព័ររបស់ Khmer ASR ដែលមានអាសយដ្ឋាន https://rnd.cadt.edu.kh/khmer-asr ឬទំនាក់ទំនងតាមរយៈអ៊ីមែល rnd@cadt.edu.kh ៕

Apple ផ្លាស់ប្ដូរមុខងារមួយចំនួន ដើម្បីកាត់បន្ថយការប្រើប្រាស់ AirTag សម្រាប់ការតាមដានទៅវិញ

obnasia — Fri, 04 Jun 2021 06:43:05 +0000

នាយកដ្ឋានប្រឆាំងបទល្មើសបច្ចេកវិទ្យា បានឲ្យដឹងថា កាលពីម្សិលមិញនេះក្រុមហ៊ុន Apple បានធ្វើបច្ចុប្បន្នភាពកម្មវិធីសម្រាប់ AirTag ដែលអាចជួយកាត់បន្ថយការប្រើប្រាស់ ឧបករណ៍នេះសម្រាប់តាមដានជនណាម្នាក់ ដែលបញ្ហានេះនាយកដ្ឋាន បានផ្សព្វផ្សាយកាលពីដើម ខែឧសភារួចមកហើយ ដើម្បីឱ្យលោកអ្នកមានការប្រុងប្រយ័ត្ន។

សម្រាប់លោកអ្នកដែលពុំទាន់ បានយល់ដឹងអំពីឧបករណ៍នេះ AirTag គឺជាឧបករណ៍សម្រាប់ស្វែងរក វត្ថុដែលលោកអ្នកងាយនឹងបាត់ ឬភ្លេច មានដូចជាកូនសោរ និងកាបូបជាដើម ប៉ុន្តែក្រុមអ្នកស្រាវជ្រាវជាច្រើនបាន បង្ហាញពីការព្រួយបារម្ភ ព្រោះជនខិលខូចក៏អាចប្រើឧបករណ៍នេះ ដើម្បីតាមដានជនណាម្នាក់បានផងដែរ។

ក្នុងការធ្វើបច្ចុប្បន្នភាពនេះ ក្រុមហ៊ុនបានធ្វើការផ្លាស់ប្ដូរការបញ្ចេញ សំឡេងឱ្យមានការប្រុងប្រយ័ត្នបន្ទាប់ពី AirTag មិននៅជិតទូរសព្ទដែលត្រូវបាន កំណត់អស់រយៈពេលបីថ្ងៃ មកនៅត្រឹមតែពី ៨ទៅ ២៤ម៉ោងវិញ។ ជាងនេះទៅទៀតក្រុមហ៊ុនក៏បានប្រកាសថា ពួកគេនឹងដាក់ឱ្យប្រើប្រាស់កម្មវិធី ដែលនឹងធ្វើការក្រើនរំឭក ប្រសិនបើមានឧបករណ៍ AirTag ដែលនៅជិតប៉ុន្តែមិនមែនជារបស់លោកអ្នក សម្រាប់ទូរសព្ទដែលមានប្រព័ន្ធប្រតិបត្តិការ Android ដែលបច្ចុប្បន្ន កម្មវិធីនេះមានសម្រាប់តែទូរសព្ទ iPhone ដែលមានប្រព័ន្ធប្រតិបត្តិការ iOS ថ្មីបំផុតនោះ។

ទោះបីជាការផ្លាស់ប្ដូរនេះអាចជួយកាត់បន្ថយ ការប្រើប្រាស់ AirTag សម្រាប់ការតាមដានក្ដី ប៉ុន្តែជនខិលខូចអាចនៅតែបន្ត ប្រើឧបករណ៍នេះដើម្បីតាមដានជនណាម្នាក់ ដោយសារតែការកំណត់យករយៈពេលពី ៨ទៅ ២៤ម៉ោង វានៅតែមានរយៈពេលយូរ នៅឡើយសម្រាប់ការតាមដាន។

ដូច្នេះដើម្បីចៀសវាងពីការតាមដានណាមួយនោះ ប្រសិនបើលោកអ្នករកឃើញ AirTag ដែលមិនមែនជារបស់លោកអ្នកនោះ លោកអ្នកគួរតែយកថ្មចេញ ដើម្បីបញ្ឈប់ការតាមដានទាំងស្រុង៕