កម្សាន្ត – OBN Asia

លោកជំទាវអ្នកឧកញ៉ា ម៉ៅ ចំណាន គិត ម៉េង នាំយកថវិកា២៥លានរៀលឧបត្ថម្ភមន្ទីរពេទ្យកុមារអង្គរ

obnasia — Fri, 16 Aug 2024 01:50:25 +0000

ភ្នំពេញ៖ នៅរសៀលថ្ងៃទី១៥ សីហា ឆ្នាំ២០២៤ នេះ លោកជំទាវអ្នកឧកញ៉ា ម៉ៅ ចំណាន គិត ម៉េង ប្រធានសមាគមសិល្បករខ្មែរ បានដឹកនាំក្រុមការងារ នាំយកថវិកាចំនួន២៥លានរៀល ឧបត្ថម្ភដល់មន្ទីរពេទ្យកុមារអង្គរ នៅខេត្តសៀមរាប។

នៅក្នុងនោះ ថវិកាចំនួន៥លានរៀល ជាថវិការបស់សមាគមសិល្បករខ្មែរ។ រីឯថវិកាចំនួន២០លានរៀលទៀត ជាថវិការបស់លោកជំទាវអ្នកឧកញ៉ាផ្ទាល់ខ្លួន។ លោកជំទាវអ្នកឧកញ៉ា ម៉ៅ ចំណាន បានបញ្ជាក់ថា នេះជាសន្តានចិត្ត និងស្មារតីរួមចំណែករបស់សមាគមសិល្បករខ្មែរ និងលោកជំទាវអ្នកឧកញ៉ាផ្ទាល់ចំពោះកុមារកម្ពុជា ដែលជាទំពាំងស្នងឫស្សី និងជាធនធានមនុស្សបន្តវេន៕

លោកស្រី មុំ ចាន់ដានី អញ្ជើញប្រគល់ផ្ទះមួយខ្នងជាអំណោយរបស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជូនតារាកំប្លែងនាយឆាង

obnasia — Fri, 19 Jul 2024 05:01:40 +0000

ភ្នំពេញ៖ លោកស្រី មុំ ចាន់ដានី និងលោក ជិន ប៊ុនធឿន អញ្ជើញប្រគល់ផ្ទះមួយខ្នង ដែលជា អំណោយដ៏ថ្លៃថ្លារបស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហម កម្ពុជា ជូនតារាកំប្លែងនាយឆាង រស់នៅសហគមន៍អណ្តូង៦ សង្កាត់គោករកា ខណ្ឌព្រែកព្នៅ នាថ្ងៃទី១៨ ខែកក្កដា ឆ្នាំ២០២៤។

នាយឆាង មានឈ្មោះពិត ជន់ ឆាន អាយុ ២៣ឆ្នាំ ទម្ងន់២១០គីឡូក្រាម មានស្រុក កំណើតនៅឃុំពាមរក៍ ស្រុកស្វាយអន្ទរ ខេត្តព្រៃវែង សព្វថ្ងៃរូបលោករស់នៅជា មួយម្តាយបង្កើត ឈ្មោះ ជន់ ញ៉ាញ់ អាយុ៦៥ឆ្នាំ មុខរបររើសនិងទិញអេតចាយ ឪពុកស្លាប់ និងមានបងប្អូនចំនួន០៥នាក់ ហើយមុនទទួលបានផ្ទះនេះ នាយឆាង និងម្តាយ សុំដីគេស្នាក់នៅបណ្តោះអាសន្នមួយកន្លែងក្រោយវត្តពោធិ៍ចិនតុង ខណ្ឌពោធិ៍សែនជ័យ។

នាឱកាសនោះ លោកស្រី មុំ ចាន់ដានី លេខាធិការគណៈកម្មាធិការសាខាកាកបាទក្រហមកម្ពុជារាជធានីភ្នំពេញ បានពាំនាំនូវការផ្តាំផ្ញើសាកសួរសុខទុក្ខពី ឯកឧត្តម ឃួង ស្រេង ប្រធានគណៈកម្មាធិការសាខា និងជាពិសេសពីសំណាក់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលជានិច្ចកាល សម្តេចប្រធានតែងតែយកចិត្តទុកដាក់គិតគូរខ្ពស់ពីសុខទុក្ខរបស់បងប្អូនប្រជាពលរដ្ឋជាទូទៅជា ពិសេស ជនរងគ្រោះ និងងាយរងគ្រោះគ្រប់ប្រភេទ ដោយមិនទុកឱ្យប្រជាពលរដ្ឋណាម្នាក់ស្លាប់ដោយយើងមិនបានដឹង ហើយមិនបានដោះស្រាយនោះឡើយ ពោល “ទីណាមានការលំបាក ទីនោះមានកាកបាទក្រហមកម្ពុជា” ។

លោក ជិន ប៊ុនធឿន នាយកប្រតិបត្តិសាខាកាកបាទក្រហមកម្ពុជា រាជធានីភ្នំពេញ ក៏សូមឱ្យអ្នកមីងជាម្តាយ ក៏ដូចជាប្អូនប្រុសផ្ទាល់ បន្តយកចិត្តទុកដាក់ខិតខំមើលថែ និងព្យាបាលជំងឺ ដោយស្តាប់តាមការណែនាំរបស់គ្រូពេទ្យ ដើម្បីឆាប់បានជាសះស្បើយ។ ពាក់ព័ន្ធនឹងផ្ទះនេះដែរ សម្រាប់រាល់ការតបណ្តាញទឹក និងភ្លើងអគ្គិសនីប្រើប្រាស់ ឯកឧត្តម ឃួង ស្រេង ប្រធានគណៈកម្មាធិការសាខា ជួយដោះស្រាយរ៉ាប់រងទាំងស្រុង ។

អ្នកមីងជន់ ញ៉ាញ់ ជាម្តាយនាយឆាង សូមថ្លែងអំណរគុណ យ៉ាងជ្រាលជ្រៅបំផុត ចំពោះសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន និងសម្តេចតេជោ ហ៊ុន សែន ដែលបានផ្តល់ទីជម្រកសមរម្យដល់ក្រុមគ្រួសារអ្នកមីង និងសូមសន្យាថែរក្សាផ្ទះនេះ ឱ្យបានស្អាតគង់វង្ស ព្រមទាំងសូមគោរពជូនពរ សម្តេចទាំងពីរ និងបុត្រា បុត្រី ចៅប្រុសចៅស្រី សូមជួបប្រទះតែនឹងពុទ្ធពរទាំងបួនប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ ។

ជាមួយគ្នានេះដែរ សាខាកាកបាទក្រហមកម្ពុជារាជធានីភ្នំពេញ ក៏បាននាំយក អំណោយមនុស្សធម៌មកផ្តល់ជូននាយឆាង រួមមាន៖ អង្ករ អាហារបំប៉ន ទឹកបរិសុទ្ធ សម្ភារផ្ទះបាយមួយចំនួន និងថវិកាចំនួន២លានរៀល៕

ឆេះហើយ!! នាយពាក់មី ឆ្លើយតបទៅនឹងគណនីហ្វេសប៊ុក Panhchaka June ពាក់ព័ន្ធវីដេអូ “ទៅជីកទំពាំង”

obnasia — Sat, 13 Jul 2024 02:57:33 +0000

ហ្វេសប៊ុក៖ នេះបើយោងតាមការបង្ហោះរបស់ផេកហ្វេសប៊ុក Chem Chanra ចែម ចាន់រ៉ា ដែលយើងស្គាល់ថាជាតារាកំប្លែងនាយ ពាក់មី បានសរសេរថា៖

“panhchaka June មេីលទៅប្អូនស្រី ដូចជាឈឺចាប់ ប្រចន្ទ័ ជាងប្រពន្ធបងទៀត ក្នុងខ្លួនកេីតអី ? ខ្ញុំនឹងប្រពន្ធខ្ញុំ ជាអ្នកផលិតវីដេអូនេះ វាជាមុខរបបែបសិល្ប: សំដែង ប្រម៉ូតផលិតផល ។ វីដេអូនេះ តេីខុសអី? ស្លៀកពាក់ធម្មតាមិនសុិចសុីហួសហេតុពេក កាសំដែងក៏មិនមានអីជ្រុលជ្រួស សូម្បីតែប:តួស្រីបន្តិចមិនប:ផង ពាក្យសម្តីក៏មិនមានពាក្យណាដែលថាជាស្នេហាជាមួយតួស្រី អត់មានទេ គឺទៅជីកទំពាំង ។ ហេីយជឿដែថាទៅថតតែ2នាក់ ក្រុមការងារ ប្រពន្ធខ្ញុំ ក៏ទៅជាមួយដែ សូមប្អូនស្រីបេីកចិត្តអោយទូលាយ ហេីយគិតថានេះជាកាសម្តែង ដេីម្បីអោយបងប្អូនមេីលលេងកំសាន្ត នឹងប្រម៉ូតផលិតផល”៕

អាកាសយានដ្ឋានបាត់ដំបង ក្លាយជាកន្លែងលំហែនាពេលល្ងាច!!

obnasia — Mon, 10 Jun 2024 07:13:04 +0000

បាត់ដំបង៖ ក្នុងទីធ្លារអាកាសយាន្តដ្ឋានបាត់ដំបងបច្ចុប្បន្ន បានក្លាយជាកន្លែងដែលប្រជាពលរដ្ឋចាប់អារម្មណ៍ ទៅលេងកម្សាន្តកកពិសេសពេលល្ងាច ដើម្បីស្រូបខ្យល់អាកាស ជួបជុំញុំាអាហារ និង លេងកីឡាជាដើម ។
ប្រជាពលរដ្ឋ ទៅលេងទីនោះភាគច្រើន ជាលក្ខណៈគ្រួសារ ខ្លះនាំកូនចៅសាច់ញាតិទៅក្រាលកន្ទេល អង្គុយលេងញ៉ាំអាហារ ដោយអង្គុយឃ្លាតៗពីគ្នា ដោយសារ ទីតាំងនេះមានទីធ្លាធំទូលាយ និង ខ្លះលេងកីឡា ដើរ រត់ និង ជិះកង់ជាដើម។

គួររំលឹកថា៖ អាកាសយានដ្ឋានបាត់ដំបង បានបើកដំណើរការដំបូង កាលពីឆ្នាំ១៩៦៧ ហើយត្រូវបានបិទដំណើរការទាំងស្រុងត្រឹម ឆ្នាំ១៩៧៥ ខណៈដែលរបបខ្មែរក្រហមកាន់កាប់អំណាច ។ ក្រោយពីរបបខ្មែរក្រហមបានដួលរលំ ព្រលានយន្តហោះខេត្តបាត់ដំបងនេះ ក៏ត្រូវបើកដំណើរការឡើងវិញ ប៉ុន្តែបម្រើឱ្យតែវិស័យអាកាសចរ ណ៍យោធាប៉ុណ្ណោះ ក្រោយ មកទៀតនាអំឡុងឆ្នាំ១៩៩១ ចំណតអាកាសយានដ្ឋាននេះបានបិទដំណើរការរហូត មកដល់បច្ចុប្បន្ន ៕

ប្រភព៖ មន្ទីរទេសចរណ៍ខេត្តបាត់ដំបង

ការចុះឈ្មោះសិល្បករដែលមានបំណងចង់ចូលជាសមាជិករបស់សមាគមនឹងចាប់ផ្ដើមឆាប់ៗនេះ

obnasia — Tue, 04 Jun 2024 01:52:51 +0000

ភ្នំពេញ៖ កិច្ចប្រជុំគណៈកម្មការប្រតិបត្តិរបស់សមាគមសិល្បករខ្មែ ដឹកនាំដោយឯកឧត្ដម ទិត ថាវរិទ្ធ ប្រធានក្រុមប្រឹក្សាភិបាល នៅល្ងាចថ្ងៃចន្ទ ទី៣ ខែមិថុនា ឆ្នាំ២០២៤ បានប្រព្រឹត្តទៅដោយពិភាក្សាលើការងារសំខាន់ៗចំពោះមុខដែលត្រូវអនុវត្តបន្ត ដើម្បីធានាសម្រេចបានតាមផែនការយុទ្ធសាស្ត្ររបស់ខ្លួនស្របតាមការប្ដេជ្ញាចិត្តរបស់លោកជំទាវអ្នកឧកញ៉ាប្រធានសមាគម ជាពិសេសការចង្អុរបង្ហាញរបស់ថ្នាក់ដឹកនាំជាតិផងដែរ។

គណៈកម្មការប្រតិបត្តិបានពិភាក្សាលើការរៀបចំដំណើរការទូទៅនៃលេខាធិការដ្ឋាន និងការបែងចែកតួនាទីភារកិច្ច ព្រមទាំងការទទួលខុសត្រូវរបស់ក្រុមការងារ ក៏ដូចជាការកែសម្រួលប្រព័ន្ធរដ្ឋបាល ដើម្បីពន្លឿន និងពង្រឹងប្រសិទ្ធភាពការងារ។

ឯកឧត្ដមប្រធានអង្គប្រជុំបានលើកឡើងពីវឌ្ឍនភាពការងារថ្មីៗដែលសម្រេចបានបន្ទាប់ពីដំណើរការអាណត្តិថ្មីបានរយៈពេល១ខែមកនេះ ជាពិសេសភាពជោគជ័យនៃការរៀបចំកម្មវិធី”អ្នកស្នងមរតក” ដែលនាំមកនូវស្នាមញញឹម និងក្ដីសង្ឃឹមដល់ព្រឹទ្ធាចារ្យ សិល្បកររៀមច្បង និងសិល្បករ សិល្បការិនីទូទៅ ដែលបង្ហាញពីការរួមសាមគ្គីជាធ្លុងមួយក្នុងចង្កោមសិល្បករ។ ជាពិសេសការគាំទ្រ និងជ្រោមជ្រែងពីថ្នាក់ដឹកនាំជាតិ រួមទាំងសប្បុរសជនពីវិស័យឯកជនផងដែរ។

បើតាមឯកឧត្ដម ការងារចំពោះមុខរបស់សមាគមសិល្បករខ្មែរនាពេលនេះ គឺរៀបចំបង្កើតគណៈកម្មការ ដើម្បីចុះឈ្មោះសិល្បករគ្រប់ទម្រង់ ដែលមានបំណងចង់ចូលជាសមាជិករបស់សមាគម ដើម្បីអាចរួមគ្នាធ្វើការកិច្ចការលើកស្ទួយវិស័យសិល្បៈវប្បធម៌ជាតិ ហើយសមាគមក៏អាចជួយពួកគាត់វិញនៅពេលមានតម្រូវការណាមួយដោយឈរលើគោលការណ៍គោរពតាមច្បាប់រដ្ឋជាធរមាន និងលក្ខន្តិកៈរបស់សមាគមសិល្បករខ្មែរ។

ទោះបីយ៉ាងណា ឯកឧត្តមប្រធានអង្គប្រជុំបានស្នើដល់ថ្នាក់ដឹកនាំគ្រប់ផ្នែកទាំងអស់នៅតែបន្តការយកចិត្តទុកដាក់ពង្រឹងប្រសិទ្ធភាពការងារ ដើម្បីឆ្លើយតបតម្រូវការរបស់សមាជិកសមាគមផង និងដើម្បីអាចមានលទ្ធភាពអនុវត្តផែនការថ្មីៗបន្តបន្ទាប់ទៀត ព្រោះនៅមានកិច្ចការជាច្រើនដែលត្រូវធ្វើ នៅក្នុងដំណាក់កាលនៃការចាប់ផ្ដើមនេះ៕

ប្រភព៖ សមាគមសិល្បករខ្មែរ

សិល្បករ សិល្បការិនី កម្ពុជាចូលរួមសម្ដែងក្នុងកម្មវិធីសប្តាហ៍វប្បធម៌អរូបី ចិន-អាស៊ាន

obnasia — Thu, 18 Apr 2024 08:50:52 +0000

ចិន៖ តបតាមការអញ្ជើញរបស់គណៈកម្មការរៀបចំសប្តាហ៍វប្បធម៌អរូបីចិន-អាស៊ាន សិល្បករ សិល្បការិនី នាយកដ្ឋានសិល្បៈទស្សនីយភាព នៃក្រសួងវប្បធម៌និងវិចិត្រសិល្បៈ រួមជាមួយ សិល្បករ សិល្បការិនី នៃបណ្តាប្រទេសអាស៊ាន ដូចជា: ប្រទេសថៃ វៀតណាម មីយ៉ាន់ម៉ា និងប្រទេសចិនដែលជាម្ចាស់ផ្ទះ បានចូលរួមសម្ដែងក្នុងកម្មវិធីសប្តាហ៍វប្បធម៌អរូបី ចិន-អាស៊ាន ( China-ASEAN Nanning Intangible Cultural Heritage Week ) ដែលបានប្រព្រឹត្តិទៅចាប់ពីថ្ងៃទី១១ ដល់ ថ្ងៃទី១៥ ខែមេសា ឆ្នាំ ២០២៤ នៅទីក្រុងណាននីង សាធារណរដ្ឋប្រជាមានិតចិន។

ប្រទេសចិន និងអាស៊ាន មានទំនាក់ទំនងជាមួយគ្នាដោយភ្នំ និងទន្លេ មានវប្បធម៌ស្រដៀងគ្នា ចំណងមិត្តភាពរវាងប្រជាជននិងប្រជាជនមានភាពរឹងមាំ ភាគីទាំងពីរមានសម្បត្តិបេតិកភណ្ឌអរូបីដ៏សម្បូរបែប និងចម្រុះពណ៌។ ក្នុងន័យនេះដែរ ដើម្បីពង្រឹងការផ្លាស់ប្ដូរ កិច្ចសហប្រតិបត្តិការរវាងប្រទេសចិន ជាមួយបណ្តាប្រទេសអាស៊ានលើការការពារ និងការប្រើប្រាស់បេតិកភណ្ឌវប្បធម៌អរូបី ការផ្សព្វផ្សាយ ការអភិវឌ្ឍធនធានទេសចរណ៍វប្បធម៌ និងកិច្ចកសាងរួមគ្នានូវសម្បត្តិបេតិកភណ្ឌវប្បធម៌អរូបីចិន-អាស៊ាន (ណាននីង)៕

ប្រភព៖ ក្រសួងព័ត៌មាន

ក្រសួងវប្បធម៌ និងវិចិត្រសិល្ប: ចេញលិខិតព្រមានផលិតកម្ម ថោន ចំពោះការផលិតចម្រៀងបទ Team ទឹកត្នោតជូរ

obnasia — Thu, 07 Mar 2024 08:40:27 +0000

ភ្នំពេញ៖ ក្រសួងវប្បធម៌ និងវិចិត្រសិល្ប: ចេញសេចក្តីព្រមានផលិតកម្ម ថោន អេនធើធេនមេន ចំពោះការផលិតចម្រៀងបទ Team ទឹកត្នោតជូរ ដែលរំលោភបំពានច្បាប់សិទ្ធិអ្នកនិពន្ធ និងសិទ្ធិប្រហាក់ប្រហែល៕

ទឹកដីកំពង់ភ្លុក និងប្រាសាទមួយចំនួនក្នុងខេត្តសៀមរាប បានក្លាយជាទីតាំងមួយសម្រាប់ថតភាពយន្តខ្នាតវែងមានចំណងជើងថា The Creator របស់ Hollywood

obnasia — Sun, 08 Oct 2023 08:50:01 +0000

សៀមរាប៖ ដោយមានការអនុញ្ញាតថតពីក្រសួងវប្បធម៌និងវិចិត្រសិល្បៈ និងដោយមានការសម្របសម្រួលពីអជ្ញាធរពាក់ព័ន្ធ ភាពយន្តខ្នាតវែងមានចំណងជើងថា The Creator ដែលជាភាពយន្តបែបវិទ្យាសាស្ត្ររបស់អាម៉េរិក ផលិតនិងដឹកនាំដោយលោក Gareth Edwards បានថតឈុតឆាកមួយចំនួននៅកំពង់ភ្លុក និងប្រាសាទមួយចំនួនទៀតក្នុងខេត្តសៀមរាប កាលពីឆ្នាំ២០២២ កន្លងមក។

ភាពយន្តនេះ មានការចូលរួមសម្តែងពីតារាភាពយន្តល្បីៗមួយចំនួន ក្នុងនោះមានតួក្មេងស្រីសំខាន់ម្នាក់ អាយុ៩ឆ្នាំ គឺជាកូនកាត់ខ្មែរ។

សូមបញ្ជាក់ថា The Creator ត្រូវបានចាប់ផ្តើមចាក់បញ្ចាំងកាលពីថ្ងៃទី២៩ ខែកញ្ញា ឆ្នាំ២០២៣ ហើយត្រឹមតែថ្ងៃទី០៥ ខែតុលានេះ ភាពយន្តនេះទទួលបានចំណូលពីការចាក់បញ្ចាំងទូទាំងពិភពលោករហូតដល់ ៣៧លានដុល្លារសហរដ្ឋអាម៉េរិក៕

ប្រភព៖ ក្រសួងវប្បធម៌ និងវិចិត្រសិល្ប:

ឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត កោតសរសើរដល់ការនាំយកព្រលឹងសិល្បៈដូនតាខ្មែរ ក្នុងឈុតអប្សរាមករាំបង្ហាញនៅលើភ្នំទឹកកកនៅប្រទេស New Zealand

obnasia — Sat, 02 Sep 2023 02:56:46 +0000

ភ្នំពេញ៖ ឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានសម្តែងនូវការអរគុណ និងកោតសរសើរដល់សិល្បករ សិល្បការិនី ដែលបានគ្រងឈុតអប្សរា រាំបង្ហាញដល់សាធារណជននៅទូទាំងពិភពលោកបានទស្សនា នៅភ្នំទឹកកកនៅប្រទេស New Zealand ។

ដោយភ្ជាប់ជាមួយវីដេអូឃ្លីបមួយ ឯកឧត្តម នាយករដ្ឋមន្ត្រីនៃព្រះរាជាណាចក្រកម្ពុជា បានបង្ហោះសារនាព្រឹកថ្ងៃទី២ ខែកញ្ញា ឆ្នាំ២០២៣នេះថា «សូមអរគុណ និងកោតសរសើរដល់ប្អូនៗ ដែលបាននាំយកព្រលឹងសិល្បៈដូនតាខ្មែរ ក្នុងឈុតអប្សរា មករាំបង្ហាញផ្សព្វផ្សាយពីអរិយធម៌ដ៏ស្រស់ត្រកាល និងរុងរឿងរបស់ខ្មែរ ដល់សាធារណជននៅទូទាំងពិភពលោកបានទស្សនា នៅភ្នំទឹកកកនៅប្រទេស New Zealand» ។

សូមបញ្ជាក់ជូនថា ឃ្លីបវីដេអូនោះ រាំដោយ នាថការីរបាំបុរាណ សុគា គីមលាង ដែលបានពត់ពែនខ្លួន បង្ហាញក្បាច់រាំដ៏រស់រវើកស័ក្តិសមជានាថការីរបាំបុរាណខ្មែរ៕

ប្រភព៖ ក្រសួងព័ត៌មាន

តំបន់ទឹកឈូបានបង្កើតជារីស្សត សណ្ឋាគារ និងផ្ទះសំណាក់ជាច្រើនដើម្បីបំពេញតម្រូវការនៃកំណើន ភ្ញៀវទេសចរ

obnasia — Tue, 30 May 2023 07:17:49 +0000

កំពត៖ តំបន់ទឹកឈូបានបង្កើតជារីស្សត សណ្ឋាគារ និងផ្ទះសំណាក់ជាច្រើននៅអមសងខាងដងព្រែក ដើម្បីបំពេញតម្រូវការនៃកំណើនភ្ញៀវទេសចរ ដែលបានចូលទៅសម្រាក និងថតរូបលេងកម្សាន្តជាហូរហែ ខណៈតំបន់នោះមានទឹកធ្លាក់លើថ្ម មានទេសភាពស្រស់បំព្រង ជាពិសេសមានកន្លែងស្នាក់នៅយ៉ាងស្រស់ ស្អាត ដែលធ្វើឱ្យភ្ញៀវទៅលេងកម្សាន្តអាចបំបាត់អស់នូវរាល់ទុក្ខកង្វល់។

លោកស្រី កៅ ពិសាល ម្ចាស់ផ្ទះលម្ហែកាយមួយកន្លែង ក្នុងស្រុកទឹកឈូបានប្រាប់វិទ្យុជាតិកម្ពុជាឲ្យដឹងថា ក្នុងពេលបច្ចុប្បន្ននេះប្រទេសកម្ពុជា មានតំបន់ទេសចរណ៍ជាច្រើន ទាំងរមណីយដ្ឋានធម្មជាតិ និង រមណីយដ្ឋានកែច្នៃ ដែលជាសក្ដានុពលទេសចរណ៍ប្រចាំតំបន់ ដើម្បីបំពេញតម្រូវការរបស់ភ្ញៀវទេសចរ។លោកស្រីបន្តថា ដោយសារតែវិស័យទេសចរណ៍នៅក្នុងប្រទេសកាន់តែមានការរីកចម្រើនឡើង ណាមួយ លោកស្រីឃើញទេសភាព នៅក្នុងស្រុកទឹកឈូមានភាពស្រស់ស្អាត ទើបសម្រេចចិត្តបង្កើតជាផ្ទះ លម្ហែកាយ ដើម្បីទទួលភ្ញៀវទេសចរមកស្នាក់នៅលេងកម្សាន្ត។ លោកស្រីបន្ថែមថា តំបន់តំបន់ទឹកឈូនេះ មានទេសភាពខៀវស្រងាត់ លាយឡំនិងសំឡេងសត្វយំ មានផ្កាចម្រុះពណ៌ស្លឹកឈើពណ៌បៃតង គួរឲ្យ គយគន់ ជាពិសេសគឺមានទឹកជ្រោះធ្លាក់ពីលើថ្មសាយភាយយ៉ាងត្រជាក់ និងមានការរៀបចំកន្លែងស្នាក់នៅ យ៉ាងមានផាសុខភាព។ ទាំងអស់នោះសុទ្ធសឹងតែជាសក្ដានុពលដ៏សំខាន់សម្រាប់ទាក់ទាញភ្ញៀវទេសចរ ទៅលេងជាហូរហែ ។លោកស្រីបានបញ្ជាក់ថា ផ្ទះលម្ហែកាយនេះ ជាផ្ទះលម្ហែកាយបែបឯកជន ជាលក្ខណៈ គ្រួសារ មានសុវត្ថិភាព មិនមានភាពរញ៉េរញ៉ៃ ពេលដែលស្នាក់នៅគឺមានអារម្មណ៏ថា ជាផ្ទះរបស់ខ្លួនឯង។

«ទីនេះគឺផ្ដោតសំខាន់ជាងគេទៅលើទេសភាព ទេសភាពកម្រ ភ្ញៀវគ្រប់គ្នាចូលចិត្តទៅលេង កម្សាន្ត ពេលដែលគាត់មកទីនេះគឺគាត់មានអារម្មណ៍ថាដូចនៅផ្ទះខ្លួនគាត់ ដូចគាត់ធ្វើផ្ទះខ្លួនគាត់ទុក សម្រាប់លម្ហែ ខ្ញុំផ្ដល់ឱ្យគាត់គ្រប់យ៉ាងដូចដែលគាត់ចង់បាន ដូចដែលគាត់មានអារម្មណ៍ថា គាត់មានផ្ទះ ខ្លួនឯងសម្រាប់លម្ហែកាយ ដូច្នេះពេលដែលគាត់ទៅលេងគាត់អាចចូលឡានខ្លួនឯងរៀបចំខ្លួនឯង បានទាំងអស់ធ្វើម្ហូបខ្លួនឯង លើកលែងតែសម្ភារៈមួយចំនួនគឺថា មានអ្នកនៅទីនោះជាអ្នករៀបចំទុកដាក់ឲ្យ ហើយយើងមានអ្នកស្នាក់នៅម្នាក់សម្រាប់ឲ្យគាត់ជួយរៀបចំ»។

សូមបញ្ជាក់ថា ទឹកឈូផ្ទះលម្ហែកាយ របស់លោកស្រីកៅ ពិសាល មានទីតាំងនៅក្នុង ស្រុកទឹកឈូ ខេត្តកំពត ដែលបានបង្កើតឡើងនៅក្នុងឆ្នាំ២០២១ ហើយដែលមានផ្ទះលម្ហែកាយដែលអាចស្នាក់នៅបាន ចំនួន១២នាក់ និង មានកន្លែងស្នាក់នៅសម្រាប់២១នាក់៕

ប្រភព៖ ក្រសួងព័ត៌មាន