សុខភាព និងសម្រស់ – OBN Asia

តើគ្រឿងស្រវឹង ផ្ដល់ផលប៉ះពាល់សុខភាពយ៉ាងណាខ្លះ ដល់អ្នកកើតជំងឺទឹកនោមផ្អែម?

obnasia — Mon, 17 Feb 2025 04:52:25 +0000

ជំងឺទឹកនោមផ្អែម គឺជាជំងឺមួយដែលបណ្ដាលមកពីអត្រាជាតិស្ករនៅក្នុងឈាមកើនលើសពីធម្មតា ដែលជាធម្មតាយើងចាត់ទុកថាជាជំងឺរ៉ាំរ៉ៃ ហើយត្រូវការពិនិត្យ និងតាមដានសុខភាពជាប្រចាំជាមួយគ្រូពេទ្យ ព្រោះអាចនឹងមានផលវិបាកនៅថ្ងៃក្រោយជាក់ជាមិនខាន។បច្ចុប្បន្នជំងឺទឹកនោមផ្អែមបានកើតទៅលើមនុស្សគ្រប់វ័យ ចាប់តាំងពីកុមាររហូតដល់មនុស្សវ័យចាស់ ។ មន្ត្រីជំនាញបានអះអាងថា ការទទួលទានអាហារមិនល្អសម្រាប់សុខភាព ការពិសាបារី ការទទួលទានគ្រឿងស្រវឹងហួសកម្រិត ការលើសទម្ងន់ជាដើម ដែលជាកត្តា ប្រឈមនាំឱ្យកើតមានជំងឺទឹកនោមផ្អែម ។

ជំងឺទឹកនោមផ្អែមមានការកើនឡើងជារៀងរាល់ឆ្នាំ នៅប្រទេសក្នុងកម្ពុជា ដោយសារជំងឺនេះជាជំងឺលាក់មុខមិនបញ្ចេញរោគសញ្ញាឱ្យដឹងក្នុងពេលដំណាក់កាលដំបូងនោះទេ។លោកវេជ្ជបណ្ឌិតទូច ឃុន ប្រធានមជ្ឈមណ្ឌលជំងឺទឹកនោមផ្អែមកម្ពុជា-កូរ៉េ នៃមន្ទីរពេទ្យមិត្តភាពកម្ពុជា-ចិន ព្រះកុសុមៈ បានមានប្រសាសន៍ថាបច្ចុប្បន្ន នៅលើសកលលោកក៏ដូចជានៅប្រទេសកម្ពុជា ប្រជាជនកើតជំងឺទឹកនោមផ្អែមប្រភេទទី២ច្រើនជាងគេ ហើយជំងឺប្រភេទទី២នេះមិនលេចចេញជារោគសញ្ញានៅតំណាក់កាលដំបូងៗនោះទេ ប៉ុន្តែវាអាចចេញជារោគសញ្ញាសម្គាល់ឱ្យយើងដឹងដូចជា នោមញឹក ស្រវាំងភ្នែក ស្រកទំនង់ ជាដើម នៅពេលដែលជាតិស្ករកើនឡើងខ្ពស់នៅក្នុងខ្លួនរយៈពេល៥ទៅ១០ឆ្នាំមកហើយ។

លោកវេជ្ជបណ្ឌិតទូច ឃុនបានលើកឡើងទៀតថា ជំងឺទឹកនោមផ្អែមទោះបីមិនមានថ្នាំព្យាបាល ឱ្យជាដាច់ ប៉ុន្តែអ្នកជំងឺអាចមានសុខភាពល្អនិងរស់នៅដូចអ្នកដទៃដែរ ប្រសិនបើពួកគាត់ធ្វើការព្យាបាលតាមវេជ្ជបញ្ជាត្រឹមត្រូវរួមទាំងការគ្រប់គ្រងអាហារប្រចាំថ្ងៃផងនោះ ជាពិសេសការតមគ្រឿងស្រវឹងប្រសិនបើអ្នកជំងឺទឹកនោមផ្អែមឧស្សាពិសារគ្រឿងស្រវឹងវាធ្វើឱ្យពិបាកក្នុងការគ្រប់គ្រងជាតិស្ករនៅក្នុងខ្លួន។

ដោយឡែកលោកវេជ្ជបណ្ឌិតមុយ ស៊ាងហ៊ន់ អនុប្រធាននាយកដ្ឋានការពារសុខភាព នៃក្រសួងសុខាភិបាលក៏បានគាំទ្រនូវការលើកឡើងខាងលើនេះដែរ ព្រោះថាគ្រឿងស្រវឹងមិនត្រឹមបង្កផលប៉ះពាល់ ចំពោះជំងឺទឹកនោមផ្អែមនោះទេ ប៉ុន្តែវាក៏ប៉ះពាល់ដល់សុខភាពដែលបង្កឱ្យកើតជំងឺផ្សេងៗជាច្រើនមុខទៀតផងដែរ។

ងាកមកលោកពូសុខ គីមហុង ជាប្រជាពលរដ្ឋរស់នៅខេត្តកំពង់ឆ្នាំបានចែករំលែកនូវបទពិសោធន៍របស់ខ្លួនដែលបានកើតជំងឺទឹកនោមផ្អែមអស់រយៈពេលជាង១០ឆ្នាំមកហើយ។

របបចំណីអាហារមានសារៈសំខាន់ណាស់សម្រាប់អ្នកកើតជំងឺទឹកនោមផ្អែម ដែលតម្រូវឱ្យពួក គាត់ត្រូវរៀបចំឱ្យបានត្រឹមត្រូវ។អ្នកមីងសុផលជាប្រជាពលរដ្ឋរស់នៅខេត្តស្វាយរៀងបានលើកឡើងថា គ្រួសារអ្នកមីងមានការយល់ដឹងច្រើនពីវិធីការពារជំងឺទឹកនោមផ្អែម ដោយការអនុវត្តរស់នៅស្អាត ព្រមទាំងបរិភោគអាហារដែលត្រឹមត្រូវ។

ជាមួយគ្នានេះដែរលោកវេជ្ជបណ្ឌិតមុយ ស៊ាងហ៊ន់បានបន្ថែមទៀតថា បច្ចុប្បន្នកំណើននៃអ្នកជំងឺទឹកនោមផ្អែមមានការកើនឡើងពីមួយឆ្នាំទៅមួយ ដូច្នេះក្រសួងសុខាភិបាលតែងតែចេញជាសារ អប់រំ ដល់ប្រជាពលរដ្ឋឱ្យស្វែងយល់អំពីជំងឺទឹកនោមផ្អែម និងវិធីការពារជំងឺទឹកនោមផ្អែម។ និយមន័យជាក់ស្ដែងជំងឺទឹកនោមផ្អែមនេះមានន័យថាជាការកើនឡើងជាតិស្កររ៉ាំរ៉ៃនៅក្នុងឈាមរបស់យើង។បានន័យថាជាតិស្កររបស់យើងនៅពេលដែលយើងហូបចំណីរអាហារដែលមានជាតិផ្អែមវាត្រូវបានបំលែងទៅជាសាធារតុចិញ្ចឹម ឬក៏ថាមពលដោយសរីរាង្គកាយរបស់យើង តាមរយៈជួយជ្រោមជ្រែងពីអកម៉ូនម្យ៉ាង ដែលបញ្ចេញពីលំពែងរបស់យើង ហៅថាអកម៉ូនអ៊ីនសូលីន នៅពេលដែលអ្នកជំងឺមានបញ្ហាទឹកនោមផ្អែម ជាតិស្ករ ទាំងអស់នោះមិនអាចយកទៅប្រើប្រាស់បំលែងជាថាមពលបានទាំងស្រុងនោះទេ ជាហេតុធ្វើឱ្យមានចាល់ជាតិស្ករនៅក្នុងឈាម ដល់ពេលចាល់រ៉ាំរ៉ៃទៅ បានជាគេហៅថាជំងឺទឹកនោមផ្អែមនេះឯង។ ជំងឺទឹកនោមផ្អែម មិនមែនជាជំងឺទើបតែមាននោះទេ ប៉ុន្តែជំងឺនេះបានកើតជាយូរណាស់មកហើយ ដោយគ្រូពេទ្យតាំងពីសម័យអេស៊ីប ក្រិច ឬរូម៉ាំងបានរកឃើញ គ្រាន់តែសម័យនោះ បច្ចេកវិទ្យាមិនទាន់ជឿនលឿន ក្រុមគ្រូពេទ្យគាត់ធ្វើការសង្កេតទៅលើអាការៈរបស់អ្នកជំងឺ ដូចជាទឹកនោមរបស់អ្នកកើតទឹកនៅមផ្អែមត្រូវបានស្រមោចរោមជាដើម។

ជំងឺទឹកនោមផ្អែមមាន៣ប្រភេទ ប្រភេទទី១ភាគច្រើនកើតទៅលើកុមារ ប្រភេទទី២ ច្រើនកើតទៅលើមនុស្សពេញវ័យ និងចំណាស់ រីឯប្រភេទី៣ ច្រើនកើតទៅលើស្ដ្រីអំឡុងពេលមានផ្ទៃពោះ។ បច្ចុប្បន្ននៅលើពិភពលោកក៏ដូចជានៅកម្ពុជាយើង ៩០ទៅ៩៥ % អ្នកកើតជំងឺទឹកនោមផ្អែមប្រភេទី២៕

ជំងឺទឹកនោមផ្អែម និងជំងឺរបេង “ចំណុចប្រសព្វដ៏គ្រោះថ្នាក់មួយនៃជំងឺឆ្លង និងមិនឆ្លង” !

obnasia — Sun, 12 Jan 2025 02:01:02 +0000

ភ្នំពេញ៖ ជំងឺរបេងគឺជាជំងឺឆ្លងដែលអាចកើតឡើងពីមនុស្សម្នាក់ទៅមនុស្សម្នាក់តាមរយៈផ្លូវដកដង្ហើម ហើយជំងឺនេះអាចកើតឡើងនៅស្ទើរតែគ្រប់សរីរាង្គនៃខ្លួនមនុស្សយើង។ ទម្រង់មួយក្នុងចំនោមទម្រង់ជាច្រើននៃ ជំងឺរបែងដែលកើតនៅលើមនុស្សយើងគឺរបេងសួត។ ស្របពេលមានកម្មវិធីជាតិនានាដែលធ្វើការប្រយុទ្ធប្រឆាំង នៃការរីករាលដាលនៃជំងឺរបេង យើងសង្កេតឃើញផងដែរថា ចំនួន អ្នកកើតជំងឺទឹកនោមផ្អែមក៏ហាក់កើនឡើង។

ការហក់ឡើងទ្វេគុណនៃជំងឺទឹកនោមផ្អែម ធ្វើឲ្យអ្នកជំនាញនានាមានការបារម្ភ អំពីការរាលដាលជំងឺរបេងទៅអ្នកជំងឺទឹកនោមផ្អែម។ ដូចដែលយើងបានដឹងកន្លងមកហើយថាអ្នកជំងឺទឹកនោមផ្អែម ពួកគាត់អាចមានកាយសម្បទាថយចុះហេតុនេះហើយ មេរោគរបេងងាយនឹងជ្រៀតចូលក្នុងខ្លួនរបស់ពួកគាត់។ បើប្រៀបធៀបទៅនឹងអ្នកដែលមិនកើតជំងឺទឹកនោមផ្អែម អ្នកដែលមានជំងឺទឹកនោមផ្អែម អត្រាដែលអាចកើតមានជំងឺរបេងគឺ មានច្រើនជាង២ទៅ៣ដង ជាពិសេសគឺក្រុមអ្នកជំងឺទឹកនោមផ្អែមដែលមិនបានព្យាបាល និងត្រួតពិនិត្យជាតិស្ករឲ្យបានត្រឹមត្រូវ។ ម្យ៉ាងវិញទៀតបើយើងប្រៀបធៀបអត្រាមរណៈនៃអ្នកដែលកើតរបេង និងមានទឹកនោមផ្អែមគឺខ្ពស់ជាង ៤ទៅ៥ដង ធៀបជាមួយអ្នកដែលកើតរបេងហើយគ្មានទឹកនោមផ្អែម។

ហេតុដូចនេះសម្រាប់អ្នកដែលមានជំងឺទឹកនោមផ្អែមគឺមានសារៈសំខាន់ណាស់ដែលត្រូវស្វែងយល់ដឹង និងបង្ការុករកជំងឺរបេង។

ក) តើនៅពេលណាអ្នកជំងឺទឹកនោមផ្អែមសង្ស័យថាខ្លួនគាត់អាចមានជំងឺរបេង?
នៅពេលដែលអ្នកជំងឺទឹកនោមផ្អែមមានលេចចេញជារោគសញ្ញាដូចជា៖
– អស់កំលាំង ល្ហិតល្ហៃ ទទួលទានមិនបាន
– ក្អកមានស្លេះលើសពី ៣ខែ
– មានអារម្មណ៍ក្តៅខ្លួនស្ទិញៗជាពិសេសក្តៅខ្លួននៅពេលរសៀល
– ស្រកទម្ងន់ដោយឥតមូលហេតុ

ខ) ការព្យាបាល៖
ការព្យាបាលជំងឺរបេងដែលកើតនៅលើអ្នកជំងឺទឹកនោមផ្អែមទាមទារឲ្យមានការចូលសហការគ្នា រវាងគ្រូពេទ្យជំនាញច្រើនផ្នែកដូចជា គ្រូពេទ្យឯកទេសខាងផ្នែកជំងឺឆ្លង គ្រូពេទ្យឯកទេសខាងផ្នែកជំងឺសួត និងគ្រូពេទ្យឯកទេសខាងផ្នែកទឹកនោមផ្អែមជាដើម ។ល។

មន្ទីរពេទ្យកាល់ម៉ែត មានគ្រប់ជំនាញឯកទេសដែលអាចឲ្យលោកអ្នកមកធ្វើការប្រឹក្សាបាន ជាងនេះទៅទៀតយើងមានឧបករណ៍ និងសម្ភារៈទំនើបៗ សម្រាប់ពិនិត្យកំហាកដូចជា ការពិនិត្យដោយផ្ទាល់នៅលើកំហាក ការបណ្តុះរកមេរោគរបេងនៅក្នុងកំហាក និងការពិនិត្យតាមរបៀប Gene Xpert។ រីឯផ្នែករូបភាពវេជ្ជសាស្ត្រ យើងមានផងដែរនូវការថតសួតដោយកាំរស្មីអ៊ិច ក៏ដូចជាម៉ាស៊ីនស៊ីធីស្កែនសម្រាប់ថតសួត ហើយលើសពីនេះទៅទៀត យើងមានឧបករណ៍សម្រាប់ឆ្លុះទងសួតដែលអាចជួយសម្រួលក្រុមគ្រួពេទ្យក្នុងការបូមយកស្លេះ មកពិនិត្យក្នុងករណីដែលអ្នកជំងឺមិនអាចខាកស្លេះចេញបាន៕

មន្ទីពេទ្យកាល់ម៉ែត បានអភិវឌ្ឍន៍បន្តដោយដាក់អោយប្រើប្រាស់ម៉ាស៊ីនអេកូម៉ូដែលទំនើបចុងក្រោយ!

obnasia — Fri, 10 Jan 2025 05:00:26 +0000

ភ្នំពេញ៖ ក្នុងទិសដៅអភិវឌ្ឍន៍ស្តង់ដារសកលនៃការថែទាំព្យាបាល ផ្នែករូបភាពវេជ្ជសាស្ត្រនៃមន្ទីរពេទ្យកាល់ម៉ែត បានទទួលការផ្តល់ជូនម៉ាស៊ីនអេកូថ្មីចំនួន០២គ្រឿងបន្ថែមទៀត ពីថ្នាក់ដឹកនាំមន្ទីរពេទ្យ ដើម្បីឆ្លើយតបទៅតំរូវការជាក់ស្តែងក្នុងផ្នែកក្នុងពេលដែលសេវាកម្មរបស់ផ្នែកមានការកើនឡើង។ ម៉ាស៊ីអេកូដែលផ្តល់រូបភាពច្បាស់ ងាយស្រួលក្នុងការធ្វើរោគវិនិច្ឆ័យ រួមផ្សំដោយវេជ្ជបណ្ឌិតឯកទេសដែលមានបទពិសោធន៍ និងមានជំនាញច្បាស់លាស់ អាចធ្វើរោគវិនិច្ឆ័យបានមានដូចជា ក្រពេញទីរ៉ូអិត ដុំសាច់នៅតំបន់ក សុដន សន្លាក់ សរីរាង្គក្នុងពោះ មាន ថ្លើម ប្រមាត់ លំពែង តម្រង់នោម ផ្លោកនោម ក្រពេញប្រូស្តាត ស្បូន ដៃស្បូន ផ្ទៃពោះ ព្រមទាំងសរសៃរឈាមទៀតផង។ល។

មន្ទីរពេទ្យកាល់ម៉ែតនៅតែបន្តការអភិវឌ្ឍន៍បច្ចេកវិទ្យាថ្មីៗបន្ថែមទៀត ក្នុងទិសដៅគ្របដណ្តប់សេវាសុខាភិបាលគ្រប់ជ្រុងជ្រោយ ជូនតាមតម្រូវការរបស់ប្រជាពលរដ្ឋយើង៕

បញ្ហាឈឺចង្កេះ ដែលយើងតែងជួបញឹកញាប់!

obnasia — Sat, 04 Jan 2025 05:11:35 +0000

ភ្នំពេញ៖ អាការៈឈឺចង្កេះ គឺជារោគសញ្ញាមួយដែលកើតមានឡើងជាញឹកញាប់ និងទូទៅមិនមានសភាពធ្ងន់ធ្ងរទេ តែជាមូលហេតុចម្បងដែលធ្វើអោយអ្នកជំងឺភាគច្រើនធ្វើការងារមិនបាន ឫរំខានញឹកញាប់កិច្ចការប្រចាំថ្ងៃ។ ការឈឺចង្កេះអាចកើតលើមនុស្សគ្រប់វ័យ ហើយភាគច្រើននៅក្នុងអាយុចន្លោះពី ៤៥ ទៅ ៥០ ឆ្នាំ។ ប្រសិនបើយើងមិនបានធ្វើការព្យាបាលអោយបានត្រឹមត្រូវនោះទេ បញ្ហាឈឺចង្កេះនេះ នឹងអាចវិវត្តន៍ទៅជាជំងឺរ៉ាំរ៉ៃ ឬធ្ងន់ធ្ងរ។

ក) មានមូលហេតុជាច្រើនដែលបណ្តាលអោយឈឺចង្កេះរួមមាន៖
– វិបត្តិសាច់ដុំ សរសៃពួរតឆ្អឹងត្រង់សន្លាក់
– ការសឹកសន្លាក់ឆ្អឹង ឬដោយសារការពុកឆ្អឹងចង្កេះ
– ការរលាកសន្លាក់ឆ្អឹង និងឆ្អឹងចង្កេះ
– ភាពចុះខ្សោយ និងការលូនមកក្រៅនៃទ្រនាប់ឆ្អឹង
– ការបាក់បែកឆ្អឹងចង្កេះដែលបណ្តាលមកពីគ្រោះថ្នាក់ ប៉ះទង្គិច ធ្លាក់ពីទីខ្ពស់ និងរអិលជាដើម
– ការគាប ឬសង្កត់ទៅលើសរសៃប្រព័ន្ធប្រសាទ
– ជំងឺមហារីក ។ល។

បញ្ជាក់៖ មូលហេតុភាគច្រើនបណ្ដាលមកពីការលូនមកក្រៅនៃទ្រនាប់ឆ្អឹង ហើយប្រសិនបើមិនបានធ្វើរោគវិនិច្ឆ័យឲ្យបានឆាប់រហ័ស និងព្យាបាលឲ្យបានត្រឹមត្រូវ វាអាចផ្ដល់ផលវិបាកដូចជា ពិការជើង វិបត្តិបន្ទោរបង់ និងការឈឺចាប់ខ្លាំងរហូតមិនអាចធ្វើការបាន។

ខ) កត្តាប្រឈមមុខនឹងបញ្ហាឈឺចង្កេះមានដូចជា៖
– អ្នកធ្វើការងារដោយប្រើកំលាំងកាយខ្លាំងដូចជា លីសែងរបស់ធ្ងន់ៗ
– អ្នកធ្វើការងារដែលអង្គុយ ឬឈរដោយប្រើរយៈពេលយូរ
– ស្ត្រីមានផ្ទៃពោះ មនុស្សធាត់ មនុស្សចាស់ជរា
– អ្នកដែលពុំសូវបានហាត់ប្រាណជាប្រចាំ
– ស្ត្រីដែលចូលចិត្តពាក់ស្បែកជើងកែងខ្ពស់ៗ

គ) ការធ្វើរោគវិនិច្ឆ័យត្រូវពឹងផ្អែកលើ៖
– ការសាកសួរពីរោគសញ្ញា និងការពិនិត្យមើលអ្នកជំងឺ
– ការពិនិត្យមើលឈាមមួយចំនួនទៅតាមប្រភេទជំងឺ
– ការថតឆ្លុះឆ្អឹងខ្នងដោយម៉ាស៊ីន កាំរស្មីអ៊ិច អ៊ឹមអរអាយ ស្កាន់នែរ (X-Ray, MRI, Scanner) ជាដើម។

ឃ) ការព្យាបាល៖
ការព្យាបាលគឺអាស្រ័យទៅលើការធ្វើរោគវិនិច្ឆ័យច្បាស់លាស់ និងការពិភាក្សាជាមួយគ្រូពេទ្យទៅតាមជំនាញឯកទេសពិតប្រាកដ ព្រមទាំងមានឧបករណ៍ពិនិត្យទំនើបដើម្បីទទួលបាននូវប្រសិទ្ធភាពខ្ពស់ និងប្រកបដោយការជឿទុកចិត្ត។ ការព្យាបាលគឺទៅតាមប្រភេទជំងឺមានដូចជា៖
– ការព្យាបាលដោយប្រើប្រាស់ថ្នាំ
– ការវះកាត់
– ការព្យាបាលដោយចលនា
– ការសម្រាកពីការងារទៅតាមសភាពធ្ងន់ធ្ងរនៃជំងឺ
– ការអប់រំពីរបៀបរស់នៅដែលល្អសម្រាប់អ្នកមានបញ្ហាឈឺចង្កេះ៕

បច្ចេកវិទ្យាអង់ដូស្កុបវះកាត់ឆ្អឹងកងខ្នងក្នុងប្រទេសកម្ពុជាដោយ UBE (Unilateral Biportal Endoscopy)!

obnasia — Wed, 01 Jan 2025 11:14:28 +0000

ភ្នំពេញ៖ ការវះកាត់លៀនទ្រនាប់ឆ្អឹងកងចង្កេះ (លៀនឌីស) បានឈានទៅរកទំនើបកម្មថ្មីមួយទៀត គឺការវះកាត់ដោយចោះ (អង់ដូស្កូប) នៅក្នុងមន្ទីពេទ្យកាល់ម៉ែត។ នេះជាបច្ចេកទេសមួយដែលត្រូវបានអនុវត្ត និងទទួលស្គាល់ថាជាវិធីសាស្ត្រមួយដែលល្អ និងផ្តល់នូវអត្ថប្រយោជន៍យ៉ាងច្រើនចំពោះអ្នកជំងឺ ពោលគឺអ្នកជំងឺឆាប់វិវត្តន៍ទៅរកស្ថានភាពល្អប្រសើរយ៉ាងឆាប់រហ័ស។

ក) រោគសញ្ញាសំខាន់ៗនៃការគាបសរសៃឆ្អឹងកងចង្កេះមាន៖
– ឈឺជើងម្ខាង រឺទាំងសងខាង
– ដើរមិនបានឆ្ងាយ
– ស្ពឹកពាក់កណ្តាលខ្លួនចុះក្រោម

ខ) បច្ចេកទេសវះកាត់ដោយចោះនេះប្រើចំពោះជំងឺ៖
– លៀនទ្រនាប់ឆ្អឹងកងចង្កេះ (Hernie discale lombaire)
– ការរួមតូចនៃប្រហោងឆ្អឹងកងចង្កេះ (Canal lombaire étroit)
– ការរអិលនៃឆ្អឹងកង (Antérolisthésis)
– ការរួមតូចនៃគម្លាតឆ្អឹងកង (Pincement discal)

គ) អត្ថប្រយោជន៍នៃការវះកាត់ដោយចោះ៖
– ស្នាមរបួសតូច
– រក្សាបាននូវទម្រង់ឆ្អឹងកងខ្នងយើងបានយ៉ាងល្អ
– បាត់បង់ឈាមតិចតួច
– អ្នកជំងឺឆាប់វិលទៅរកស្ថានភាពប្រក្រតីឆាប់រហ័ស៕

ប្រភព៖ មន្ទីរពេទ្យកាល់ម៉ែត – Calmette Hospital

ចិនកំពុងប្រយុទ្ធនឹងការផ្ទុះឡើងនៃមេរោគ human metapneumovirus (HMPV) ដែលមានរោគសញ្ញាស្រដៀងនឹងជំងឺផ្តាសាយធំ និង COVID-19

obnasia — Sat, 28 Dec 2024 06:19:15 +0000

ចិន៖ វេជ្ជបណ្ឌិត Chen Chih-jung នៃមន្ទីរពេទ្យ Linkou Chang Gung Memorial Hospital បាននិយាយនៅក្នុងបទសម្ភាសន៍មួយកាលពីថ្ងៃព្រហស្បតិ៍ថា hMPV គឺស្រដៀងទៅនឹងមេរោគផ្លូវដង្ហើម RSV (ជាមេរោគបង្កជំងឺផ្លូវដង្ហេីមដែរ) ដែលភាគច្រើនឆ្លងដល់កុមារអាយុក្រោម 2 ឆ្នាំ ខណៈដែល hMPV មាននិន្នាការឆ្លងកុមារធំ។ លោកបានពន្យល់ថា កុមារខ្លះដែលឆ្លងមេរោគអាចតម្រូវឱ្យចូលមន្ទីរពេទ្យ ប៉ុន្តែជំងឺនេះមិនសូវធ្ងន់ធ្ងរដូចជំងឺគ្រុនផ្តាសាយធំទេ ហេីយកុមារភាគច្រើនបានជាសះស្បើយឡើងវិញ។

សូមបញ្ជាក់ថា ក្នុងរដូវរងារនេះ អ្នកមានរោគផ្តាសាយ និងរលាកផ្លូវដង្ហេីម គឺភាគច្រេីនបង្កឡេីងដោយមេរោគផ្តាសាយធំ Influenza ។ ដេីម្បីបង្ការចម្លងមេរោគផ្តាសាយ និងមេរោគផ្លូវដង្ហេីមផ្សេងៗ សូមពាក់ម៉ាស់ រក្សាគម្លាត ឧស្សាហ៏លាងដៃញឹកញប់ ចៀសវាងកន្លែងមានមនុស្សច្រើន ដើម្បីកាត់បន្ថយការឆ្លងរាលដាល៕

ប្រភព៖ នាយកដ្ឋានប្រយុទ្ធនឹងជំងឺឆ្លង CDC

អ្វីជាជំងឺរមួលទងពងស្វាស ( Testicular torsion ) ?

obnasia — Sat, 28 Dec 2024 02:53:49 +0000

ភ្នំពេញ៖ ការរមួលទងពងស្វាស ភាគច្រើនកើតលើបុរសដែលមានវ័យជំទង ឬទើបតែពេញវ័យ ត្រូវបានចាត់ទុកជាជំងឺបន្ទាន់ ដែលទាមទារការធ្វើរោគវិនិច្ឆ័យឆាប់រហ័ស ដើម្បីអោយការព្យាបាលមានប្រសិទ្ធិភាពខ្ពស់ ។

១) តើអ្វីជាជំងឺរមួលទងពងស្វាស?
ការរមួលទងពងស្វាសជាការរមួលនៃរចនាសម្ព័ន្ធខ្សែមេជីវិតឈ្មោល និងសរសៃឈាមរបស់ពងស្វាសដែលនាំអោយមានការកកស្ទះសរសៃឈាមទៅចិញ្ចឹម ពងស្វាស(ischemia) ។

២) រោគសញ្ញានៃជំងឺរមួលទងពងស្វាស
– ការចាប់ផ្តើមឈឺ ភ្លាមៗ បន្ទាប់ពីលេងកីឡា រឺ លំហាត់ប្រាណ
– ឈឺចុកចាប់ខ្លាំងនៅត្រង់ពងស្វាសម្ខាង
– ពងស្វាស មានសភាពកន្ទ្រាក់ទាញទៅលើបើប្រៀបធៀបនឹងម្ខាងទៀត
– ពងស្វាសហើមធំ រឹង ប្រែពណ៍ខុសធម្មតា
– អាចមានសញ្ញាចង្អោរ ចង់ក្អួត ក្តៅខ្លួន ជាដើម។

៣) រោគវិនិច្ឆ័យអមគ្លីនិក
– អេកូនៅតំបន់ទងពងស្វាស ដើម្បីរកមូលហេតុច្បាស់លាស់ (Testicular Ultrasound)
– អេកូសរសៃឈាមទៅចិញ្ចឹមពងស្វាស (Doppler Testicular Ultrasound)

៤) ការព្យាបាល
ការវះកាត់ ត្រូវធ្វើឡើងបន្ទាន់ ក្នុងករណី រកឃើញថាមានជំងឺរមួលទងពងស្វាស ។
ក្នុងការវះកាត់ យើងអាចវាយតម្លៃជាក់ស្តែងលើស្ថានភាពនៃពងស្វាស ៖
– រយៈពេលក្រោម ៦ម៉ោង អាចនៅមានឈាមមកចិញ្ចឹមវិញ បន្ទាប់ពីពន្លានៃការរមួល យើងអាចដេរផ្ជាប់នឹងថង់ពងស្វាស (surgery detorsion + Orchidopexy) ។
– រយៈពេលលើសពី៦ ទៅ១២ម៉ោង ក្នុងលក្ខខណ្ឌ បើក្នុងការវះកាត់ពងស្វាសមិនមានឈាមទៅចិញ្ចឹមវិញទេ យើងនឹងធ្វើការកាត់ពងស្វាសដែលខូចនោះចេញតែម្តង (Orchidectomy)។

បើបងប្អូន មានបញ្ហាឈឺចុកចាប់នៅតំបន់ពងស្វាស សូមប្រញាប់អញ្ជើញមកជួបជាមួយក្រុមគ្រូពេទ្យឯកទេស នៅមន្ទីរពេទ្យកាល់ម៉ែត ដើម្បីពិគ្រោះ និង ព្យាបាលទាន់ពេលវេលា ប្រកបដោយគុណភាព និងប្រសិទ្ធិភាពខ្ពស់៕

ប្រភព៖ មន្ទីរពេទ្យកាល់ម៉ែត – Calmette Hospital

ថ្នាំចាក់បង្ការការឆ្លងមេរោគអេដស៍ឈ្មោះ Cabotegravir មិនមែនជាវ៉ាក់សាំងទេ

obnasia — Fri, 27 Dec 2024 08:18:14 +0000

ភ្នំពេញ៖ ក្រសួងសុខាភិបាល នឹងដាក់ឱ្យប្រើប្រាស់ថ្នាំបង្ការ មុនពេលប្រឈមនឹងការឆ្លងមេរោគអេដស៍ (Pre-Exposure Prophylaxis = ថ្នាំព្រឹព) ជាប្រភេទថ្នាំចាក់ឈ្មោះ Cabotegravir ដែលត្រូវចាក់រៀងរាល់ ២ខែម្តង សម្រាប់បង្ការការឆ្លងមេរោគអេដស៍ មុនពេលប្រឈម ជូនក្រុមប្រជាជនគន្លឹះដែលមានប្រឈមខ្ពស់នឹងការឆ្លងមេរោគអេដស៍ រួមមាន ក្រុមស្ត្រីបម្រើសេវាកំសាន្ត ក្រុមបុរសរួមភេទជាមួយបុរស ក្រុមអ្នកប្លែងភេទ ក្រុមអ្នកប្រើប្រាស់គ្រឿងញៀនដោយចាក់ ។ ល។ ថ្នាំនេះមានប្រសិទ្ធភាពក្នុងការបង្ការការចម្លងមេរោគអេដស៍បានក្នុងកម្រិតចន្លោះពី ៩២ ទៅ ៩៥%។

សូមបញ្ជាក់ថា មកដល់ពេលនេះ ពិភពលោកយេីងមិនទាន់រកឃើញវ៉ាក់សាំងសម្រាប់បង្ការមេរោគអេដស៍នៅឡើយទេ៕

ប្រភព៖ នាយកដ្ឋានប្រយុទ្ធនឹងជំងឺឆ្លង CDC

មកស្វែងយល់អំពីវិធីសាស្ត្របឋមដើម្បីបង្ការ និងព្យាបាល ជំងឺគ្រុនផ្តាសាយ

obnasia — Thu, 19 Dec 2024 06:55:25 +0000

ភ្នំពេញ៖ វិធីសាស្ត្របឋមដើម្បីបង្ការ និងព្យាបាល ជំងឺគ្រុនផ្តាសាយ៖

១) អ្វីទៅជាជំងឺគ្រុនផ្តាសាយ ?
ជាជំងឺដែលបង្កឡើងដោយ វីរុស(Virus)។
ភាគច្រើនជំងឺនេះច្រើនកើតឡើងនៅរដូវវស្សា និងរដូវលំហើយ។

២) ការចម្លងមេរោគ÷
ជំងឺផ្តាសាយឆ្លងតាមរយៈ
– ការក្អក
– កណ្តាស់
– សំបោរ ស្លេស
– នៅក្បែរអ្នកជំងឺផ្តាសាយ ឬប៉ះវត្ថុដែលមានមេរោគ

៣) រោគសញ្ញា÷
អាការៈទូទៅនៃជំងឺគ្រុនផ្តាសាយមាន:
– ចាប់ផ្តើមឈឺគ្រុនក្តៅភ្លាមៗ
– អស់កម្លាំង ខ្សោយ ល្ហិតល្ហៃ
– ឈឺខ្លួន ឈឺក ឈឺក្បាល រងា ញាក់
– ក្អកហៀសំបោរ ។ល។

៤) វិធីបង្ការ÷
ដើម្បីបង្ការកុំអោយឆ្លងជំងឺគ្រុនផ្តាសាយយើងត្រូវអនុវត្តៈ
– ចាក់ថ្នាំបង្ការជំងឺគ្រុនផ្តាសាយរៀងរាល់១ឆ្នាំម្តង។
– ខ្ទប់មាត់របស់អ្នកដោយប្រើក្រដាស ឬកន្សែងនៅពេលក្អក ឬកណ្តាស់ ឬខ្ទប់មាត់ដោយដៃរបស់អ្នក
– លាងដៃអោយបានស្អាត
– សម្អាតសម្ភារៈប្រើប្រាស់អោយបានស្អាត
– ពាក់ម៉ាស់អោយបានត្រឹមត្រូវ ។

៥) វិធីសាស្ត្របឋមដើម្បីព្យាបាលជំងឺគ្រុនផ្តាសាយមាន៖
ក. វិធីព្យាបាលតាមបែបធម្មជាតិ:
– សម្រាកអោយបានគ្រប់គ្រាន់ និងមានខ្យល់អាកាសបរិសុទ្ធ
– ផឹកទឹកអោយបានច្រើន
– វិធីទី ១ ហាន់ខ្ញីជាចំណិតៗតូចៗហើយលាយជាមួយទឹកក្តៅផឹករាល់ថ្ងៃ។
– វិធីទី ២ លាយទឹកឃ្មុំ ២ស្លាបព្រាកាហ្វេ និងទឹកក្រូចឆ្មា១ស្លាបព្រាកាហ្វេ រួចយកទៅលាយជាមួយទឹកក្តៅមួយកែវតូចល្មមដើម្បីផឹករាល់ថ្ងៃ។

ខ. វិធីព្យាបាលដោយប្រើប្រាស់ឱសថដែលអាចប្រើប្រាស់បាននៅក្នុងគេហដ្ឋាន:
– បើមានអាការៈឈឺក្បាល ឬគ្រុនក្តៅ៖ ប្រើឱសថប៉ារ៉ាសេតាម៉ុល មិនអោយលើសពី ៣ក្រាមក្នុងមួយថ្ងៃ (ចំពោះមនុស្សធំ) ឬមិនអោយលើសពី ៦០មីលីក្រាមក្នុង ១គីឡូ (ចំពោះក្មេង)។
– ករណីមានអាការៈ ផ្តាសាយហៀសំបោរបន្ថែម៖ គួរប្រើឱសថ ប្រូមេតាស៊ីនបន្ថែម ២ ទៅ ៤ដងក្នុង១ថ្ងៃ មិនអោយលើសពី ១៥០មីលីក្រាមក្នុង១ថ្ងៃ (ចំពោះមនុស្សធំ) ឬTamiflu ចំនួន៧៥មីលីក្រាម ២ដងក្នុងមួយថ្ងៃ (រយៈពេល៥ថ្ងៃ)។

បើមានរោគសញ្ញាណាមួយកើតឡើងដូចជា ឈឺបំពង់ក ឈឺច្រមុះ និងក្តៅខ្លួនខ្លាំងលើសពី៣៨អង្សាសេ អ្នកជំងឺគួរស្វែងរកសេវាពិនិត្យពិគ្រោះយោបល់ជាមួយគ្រូពេទ្យជំនាញនៃមន្ទីរពេទ្យកាល់ម៉ែតដើម្បីទទួលបានការពិនិត្យ និងព្យាបាលត្រឹមត្រូវ និងជៀសវាងការផ្សំថ្នាំលេបដោយគ្មានវេជ្ជបញ្ជាត្រឹមត្រូវដែលអាចនាំអោយប៉ះពាល់ដល់សុខភាពលោកអ្នក៕

ប្រភព៖ មន្ទីរពេទ្យកាល់ម៉ែត

មកយល់ដឹងអំពីជំងឺដែលបង្កឡេីងដោយមេរោគ Norovirus

obnasia — Sun, 15 Dec 2024 08:06:17 +0000

ភ្នំពេញ៖ នេះបើយោងតាមការចេញផ្សាយរបស់ នាយកដ្ឋានប្រយុទ្ធនឹងជំងឺឆ្លង CDC តាមរយៈបណ្តាញសង្គមហ្វេសប៊ុកអំពីជំងឺដែលបង្កដោយមេរោគ Norovirus ថាជាជំងឺនេះកេីតឡេីងជាប្រចាំនៅបណ្តាប្រទេសត្រជាក់ ឬហៅថា ជំងឺក្អូតរាកបង្កឡេីងដោយមេរោគនៅរដូវត្រជាក់ ដែលតែងតែកេីតឡេីង និងរាតត្បាតនៅបណ្តាប្រទេសត្រជាក់ដូចជា ចិន អាមេរិក អឺរ៉ុប ។ ល។

– ជាមេរោគមានវត្តមានយូរមកហេីយ និងមិនមែនជាមេរោគផ្ទុះថ្មីទេឬក៏គម្រាមកំហែងរាតត្បាតសកលទេ
– ជាមេរោគងាយងាប់នៅសីតុណ្ហភាពក្តៅ ចាប់ពី ៦០អង្សារឡេីងទៅ ដូច្នេះមិនងាយមានវត្តមាននៅក្នុងប្រទេសក្តៅសេីមទេ ដូចជាប្រទេសយេីងជាដេីម
– អ្នកឆ្លងជំងឺនេះមានរោគសញ្ញា ចង្អោរ ក្អួត រាក និងងាយជាទៅវិញរយៈពេលខ្លី
– ឆ្លងតាមរយៈប៉ះពាល់ផ្ទាល់ជាមួយទឹកសរីរាង្គអ្នកជំងឺដូចជា ក្អក កំអួត លាមក
– បង្ការជំងឺតាមរយៈ ពាក់ម៉ាស់ លាងដៃ សំអាតអនាម័យ ប្រដាប់ប្រេីប្រាស់ និងបរិដ្ឋានជុំវិញ៕