ប្រដាល់ – OBN Asia

នាយកប្រតិបត្តិរបស់ Betis បញ្ជាក់ពីអនាគតរបស់ Antony

Tico — Wed, 05 Mar 2025 09:14:25 +0000

កីឡាករ Antony គ្រោងនឹងត្រលប់ទៅកាន់ Old Trafford វិញនៅចុងបញ្ចប់នៃរដូវកាលនេះ ប៉ុន្តែការពិភាក្សាអំពីការបន្តការស្នាក់នៅរបស់គាត់នៅក្នុងប្រទេសអេស្ប៉ាញកំពុងដំណើរការរួចហើយ។ លោក Ramon Alarcon នាយកប្រតិបត្តិរបស់ Betis បានបង្ហាញនៅក្នុងបទសម្ភាសន៍ជាមួយ «El Pelotazo» របស់ Canal Sur ដែលត្រូវបានចេញផ្សាយដោយ Mundo Deportivo ថាខ្សែបម្រើស្លាបសញ្ជាតិប្រេស៊ីលបានបង្ហាញពីចំណាប់អារម្មណ៍របស់គាត់ក្នុងការបន្តស្នាក់នៅក្នុងក្លឹប Real Betis។

លោក Ramon Alarcon បាននិយយថា៖ «នៅថ្ងៃមុន Antony បានប្រាប់ខ្ញុំថាគាត់ចង់នៅមួយឆ្នាំទៀត។ កីឡាករមានអារម្មណ៍ល្អនៅទីនេះ ហើយមានការភ្ញាក់ផ្អើលចំពោះគ្រឿងបរិក្ខារដែលយើងផ្តល់ឱ្យគាត់ដើម្បីតាំងទីលំនៅក្នុងទីក្រុងភ្លាមៗនៅពេលគាត់មកដល់»៕

ប្រដាល់គុនខ្មែរនឹងបង្ហាញវត្តមានលើទឹកដីអាមេរិក ដោយភាពស្មើមុខលើឆាកអន្ដរជាតិ

Tico — Thu, 05 Dec 2024 09:32:30 +0000

សហព័ន្ធកីឡាប្រដាល់គុនខ្មែរនឹងបោះជំហានថ្មីមួយទៀត នៅលើទឹកដីសហរដ្ឋអាមេរិក ដើម្បីបង្ហាញនូវភាពស្មើមុខស្មើមាត់លើឆាកអន្ដរជាតិ ក្នុងនាមម្ចាស់ក្បាច់គុន ក៏ដូចជាផ្សព្វផ្សាយនូវសិល្បៈក្បាច់គុនបុរាណខ្មែរ។

នេះបើតាមការលើកឡើងរបស់ឯកឧត្តម ខូវ ឆាយ ប្រធានសហព័ន្ធកីឡាប្រដាល់គុនខ្មែរ ក្រោយដឹកនាំប្រតិភូត្រឡប់មកដល់កម្ពុជាវិញ កាលពីពេលថ្មីៗនេះ បន្ទាប់ពីដំណើរទស្សនកិច្ច និងជួបពិភាក្សាការងារ តបតាមការអញ្ជើញរបស់សភាពពាណិជ្ជកម្មខ្មែរប្រចាំរដ្ឋកាលីហ្វ័រញ៉ា និងសមាគមបងប្អូនខ្មែររស់នៅទីក្រុង Long Beach ជិត ១សប្ដាហ៍។

ឯកឧត្តម ខូវ ឆាយ គូសបញ្ជាក់ថា ក្រោយជំនួបពិភាក្សា ភាគីពាក់ព័ន្ធបានឯកភាពរៀបចំការប្រកួតគុនខ្មែរ នៅសហរដ្ឋអាមេរិក កំឡុងខែមេសា ឆ្នាំ២០២៥ ទី១-ការប្រកួតនៅរដ្ឋ Washington នាថ្ងៃទី០៥-មេសា មានកីឡាករ ៣រូប និងកីឡាការិនី ១រូប និងទី២-ការប្រកួតអបអរពិធីបុណ្យចូលឆ្នាំថ្មីប្រពៃណីជាតិខ្មែរ ចន្លោះថ្ងៃទី១៣ ដល់ថ្ងៃទី១៥ ខែមេសា ឆ្នាំ២០២៥ នៅទីក្រុង Long Beach រដ្ឋកាលីហ្វ័រញ៉ា ដែលអាចមានកីឡាករ ៦រូប កីឡាការិនី ១រូប ហើយក៏អាចមានក្រុមភ្លេង និងក្រុមសិល្បៈ ដើម្បីជំរុញព្រឹត្តិការណ៍ឱ្យកាន់តែទាក់ទាញ។ សហព័ន្ធកីឡាប្រដាល់គុនខ្មែរបានបង្ហាញពីការត្រៀមខ្លួនរួចរាល់ ទៅរៀបចំព្រឹត្តិការណ៍គុនខ្មែរ លើកទឹកដីសហរដ្ឋអាមេរិក ដើម្បីផ្ដល់នូវភាពសប្បាយរីករាយ ក្នុងនាមមហាគ្រួសារខ្មែរ កំឡុងពិធីបុណ្យចូលឆ្នាំថ្មីប្រពៃណីជាតិខ្មែរ នាខែមេសា ឆ្នាំ២០២៥ ខាងមុខផងដែរ ។

ឯកឧត្តមបន្ដថា នេះគឺជាពេលវេលា ដែលគុនខ្មែរ ត្រូវសហការជាមួយបងប្អូនខ្មែរក្រៅប្រទេស ដើម្បីរៀបចំព្រឹត្តិការណ៍គុនខ្មែរដោយខ្លួនឯង ព្រោះកន្លងមក សកម្មភាពប្រដាល់គុនខ្មែរលើទឹកដីអាមេរិកមិនសូវមាន ហើយបើមានក៏ជ្រកក្រោមក្បាច់គុនប្រទេសដទៃដែរ។ អ្វីដែលជាការកត់សម្គាល់ខ្លាំង គឺនៅឆ្នាំ២០២៤នេះ ជាឆ្នាំដ៏ជោគជ័យមួយ សម្រាប់វិស័យកីឡាប្រដាល់គុនខ្មែរ ដែលត្រូវបានសហព័ន្ធ ខិតខំប្រឹងប្រែងជំរុញសកម្មភាពប្រកួត និងផ្សព្វផ្សាយទៅលើឆាកអន្ដរជាតិ ជាក់ស្ដែងកន្លងមក គុនខ្មែរ ត្រូវបានរៀបចំទៅកាន់បណ្ដាប្រទេសជាច្រើនលើពិភពលោក ទាំងទ្វីបអាស៊ី អូសេអានី និងទ្វីបអឺរ៉ុបជាដើម មុនបន្ដសកម្មភាពទៅកាន់ទ្វីបអាមេរិកជាប្រវត្តិសាស្ដ្រនាពេលឆាប់ៗខាងមុខ ខណៈសកម្មភាពក្នុងប្រទេស ក៏មានប្រជាពលរដ្ឋគាំទ្រយ៉ាងច្រើនកុះករផងដែរ៕

កីឡាករគុនខ្មែរមកពីខេត្តរតនគិរី ផាន់ ណាំតៃ ប្តេជ្ញាប្រកួតដណ្តើមខ្សែក្រវាត់ឱ្យបាន១ជូនក្រុមគ្រួសារ

obnasia — Fri, 19 Apr 2024 01:25:07 +0000

ភ្នំពេញ៖ បើទោះបីជាចូលប្រឡូកក្នុងវិស័យកីឡាប្រដាល់គុនខ្មែរអស់រយៈពេល៣ឆ្នាំ និងធ្លាប់ប្រកួតជាតិ-អន្តរជាតិប្រមាន៥០លើកក្តី ប៉ុន្តែកីឡាករគុនខ្មែរ ផាន់ ណាំតៃ មកពីខេត្តរតនគិរីរូបនេះមិនទាន់ឈ្នះខ្សែក្រវាត់ណាមួយជូនក្លឹប និងក្រុមគួសារនៅឡើយ។

នៅក្នុងអំឡុងពេលហ្វឹកហាត់ នៅក្លឹបគុនខ្មែរលោកគ្រូ ពេជ្រ សុផាន់ ស្ថិតនៅខណ្ឌដង្កោ រាជធានីភ្នំពេញ កីឡាករ ផាន់ ណាំតៃ បានលើកឡើងថា ខ្លួនបានចូលហ្វឹកហាត់រយៈពេល៣ឆ្នាំ និងបានឡើងប្រកួតចំនួន៥០ដង នៅតាមសង្វៀននានា ក្នុងនោះធ្លាប់ជួបប្រកួតជាមួយកីឡាករខ្មែរជាង២០ប្រកួត និងធ្លាប់ប្រកួតអន្តរជាតិជាង ២០ប្រកួត ដោយមានឈ្នះ មានចាញ់ ប៉ុន្តែក្តីប្រាថ្នាដ៏ធំរបស់អ្នកលេងគុនមានស្រុកកំណើតនៅខេត្តរតនគិរីរូបនេះគឺចង់ឈ្នះខ្សែក្រវាត់ណាមួយជូនក្លឹប និងក្រុមគ្រួសារ។

ស្ថិតក្នុងវ័យ២២ឆ្នាំ យុវជន ផាន់ ណាំតៃ បញ្ជាក់ជូនថា បច្ចុប្បន្នបើទោះបីជាគុណភាពបច្ចេកទេសរបស់ខ្លួនបានធ្លាក់ចុះបន្តិចជាងពេលមុនៗដោយសារកត្តាសុខភាពក្តី ក៏រូបគេនៅតែចឹញ្ចឹមចិត្តប្រឹងប្រែងហ្វឹកហាត់យ៉ាងខ្លាំងក្លាផងដែរ ដើម្បីបន្តការអភិវឌ្ឍជំនាញកីឡាគុនខ្មែរឱ្យកាន់តែល្អប្រសើរ។ ផាន់ ណាំតៃ បន្ថែមថា ខ្លួនធ្លាប់ឈប់សម្រាកមួយរយៈពីវិស័យកីឡាប្រដាល់គុនខ្មែរម្តងដែរ ក្នុងរយៈពេលហ្វឹកហាត់ និងប្រកួត៣ឆ្នាំនេះ ប៉ុន្តែដោយសារតែក្តីស្រឡាញ់វិស័យកីឡាប្រដាល់គុនខ្មែរ និងអាចដោះស្រាយជីវភាពរបស់ខ្លួនផងនោះ ទើបកីឡាករ ផាន់ ណាំតៃ ចូលខ្លួនមកហ្វឹកហាត់បន្តវិញ ដើម្បីត្រៀមឡើងប្រកួតលើសង្វៀនជាបន្តបន្ទាប់ទៀត។

ជាមួយនឹងការតាំងចិត្តខ្ពស់ក្នុងប្រភេទកីឡាប្រយុទ្ធរបស់កម្ពុជាមួយនេះ ណាំតៃ ក៏បានបង្ហាញពីការប្តេជ្ញាចិត្តខ្ពស់ថា ដោយសារតែចង់ល្បីល្បាញ ទើបការចាកចេញពីប្រដាល់គុនខ្មែរនោះមិនបានយូរទេ ហើយក៏សម្រេចចិត្តចូលមកហ្វឹកហាត់បន្តវិញ។ មូលហេតុចម្បងដែលធ្វើឱ្យ ណាំតៃ ចូលហ្វឹកហាត់គុនខ្មែរដំបូង គឺដោយសារតែការស្រឡាញ់និមិត្តរូបគុនខ្មែរម្នាក់ គឺកីឡាករ ឃុន ឌីម៉ា បើទោះបីជាកាលពីដំបូងមានការរារាំងឃាំងឃាត់ពីក្រុមគ្រួសាររបស់ខ្លួនយ៉ាងណាក្តី។

អ្នកប្រដាល់គុនខ្មែរ ផាន់ ណាំតៃ ជាកូនទី៣ក្នុងគ្រួសារ ដែលមានស្រុកកំណើតនៅខេត្តរតនគិរី ប្តេជ្ញាថានឹងខិតខំហ្វឹកហាត់ និងឡើងប្រកួតឱ្យបានខ្សែក្រវាត់១ជូនក្រុមគ្រួសារ ដោយនេះគឺជាបំណងប្រាថ្នាដ៏ធំរបស់គេ ដើម្បីកសាងកិត្តិយសជូនគ្រួសារ ក៏ដូចជាមានគោលបំណងរួមចំណែកលើកកម្ពស់ដល់ការអភិរក្ស និងអភិវឌ្ឍវិស័យក្បាច់គុនប្រពៃណីជាតិខ្មែរមួយនេះឱ្យកាន់តែរីកចម្រើនផងដែរ៕

ប្រភព៖ AKP

ឧកញ៉ាស្រី ចាន់ថន ប្រកាសរៀបចំការប្រកួតអាណាចក្រគុនខ្មែរ KKIF

obnasia — Sat, 07 Oct 2023 03:24:19 +0000

ភ្នំពេញ៖ លោកឧកញ៉ា ស្រី ចាន់ថន ប្រធានក្លឹបប្រដាល់គុនខ្មែរអន្តរជាតិ(Kun Khmer International Fight Gym-KKIF) និងជាអនុប្រធានកិត្តិយសសហព័ន្ធកីឡាប្រដាល់គុនខ្មែរបានប្រកាសជាផ្លូវការថានឹងរៀបចំព្រឹត្តិការណ៍ប្រដាល់ថ្នាលគុនខ្មែរដែលឲ្យឈ្មោះថា«អាណាចក្រថ្នាលគុនខ្មែរ KKIF» ចាប់ពីចុងខែតុលា ឆ្នាំ២០២៣តទៅ នៅរៀងរាល់យប់ថ្ងៃសុក្រ ចាប់ពីម៉ោង១៩:០០នាទីតទៅ នាសង្វៀនក្លឹប KKIF ជូនអ្នកគាំទ្រគុនខ្មែរបានទស្សនា។

នេះបើតាមការគូសបញ្ជាក់របស់លោកឧកញ៉ា ស្រី ចាន់ថន កាលពីថ្ងៃទី០៥ ខែតុលា ឆ្នាំ២០២៣ ក្នុងគោលដៅបណ្តុះធនធានថ្នាលកីឡាករប្រដាល់គុនខ្មែរឱ្យកាន់តែសម្បូរបែប ក្នុងការបន្តដំណើរការអភិវឌ្ឍវិស័យកីឡាប្រដាល់គុនខ្មែរឱ្យកាន់តែរីកចម្រើនបន្ថែមទៀត។ ប្រធានក្លឹបរូបនេះគូសបញ្ជាក់ថា «បន្ទាប់ពីបញ្ចប់បេសកកម្មនៅសហរដ្ឋអាមេរិករួចមកខណៈត្រឡប់មកដល់មាតុភូមិកម្ពុជាវិញ ខ្ញុំបាទបានចាត់ចែងឱ្យក្រុមការងារត្រៀមរៀបចំព្រឹត្តិការណ៍ប្រដាល់ថ្នាលគុនខ្មែរចាប់ពីចុងខែតុលានេះ ដោយដំណើរការប្រកួតរៀងរាល់យប់ថ្ងៃសុក្រ ចាប់ពីម៉ោង១៩:០០នាទីតទៅ នាសង្វៀនក្លឹ KKIF ជូនពុកម៉ែបងប្អូនអ្នកគាំទ្រគុនខ្មែរបានទស្សនា»។

លោកឧកញ៉ាបានបន្ថែមថា កម្មវិធីនោះមានឈ្មោះថា “អាណាចក្រថ្នាលគុនខ្មែរ KKIF”ដើម្បីផ្ដល់ឱកាសឱ្យកីឡាករ កីឡាការិនីថ្មីៗខ្ចីបទពិសោធបានបញ្ចេញសមត្ថភាពក្នុងការដណ្ដើមខ្សែក្រវាត់ KKIF ឬពានរង្វាន់ផ្សេងៗ។ រីឯផែនការលម្អិតជាងនេះ លោកឧកញ៉ាស្រី ចាន់ថន នឹងជម្រាបជូននៅពេលក្រោយ។រឿងពិសេសមួយទៀតនោះ គឺនៅចុងឆ្នាំ២០២៣ដដែលនេះ យើងនឹងគ្រោងរៀបចំព្រឹត្តិការណ៍គុនខ្មែរដ៏ធំមួយផ្សេងទៀត ដោយមិនទាន់ដាក់ឈ្មោះកម្មវិធីនេះនៅឡើយទេ ដោយស្នើសុំឱ្យមហាជនបានចូលរួមបញ្ចេញមតិយោបល់ទាំងអស់គ្នាផង ក្នុងន័យរួមគ្នា ដើម្បីអភិវឌ្ឍន៍គុនខ្មែរទាំងអស់គ្នា។

គួរបញ្ជាក់ថា លោកឧកញ៉ា ស្រី ចាន់ថន តែងតែបានរួមចំណែកជួយជ្រោមជ្រែងដល់វិស័យកីឡាប្រដាល់គុនខ្មែរ ជាពិសេសលោកឧកញ៉ាតែងតែបានជួយឧបត្ថម្ភគាំទ្រជាថវិកា សម្ភារដល់កីឡាករ កីឡាការិនី និងក្លិបប្រដាល់គុនខ្មែរដទៃៗទៀតជាច្រើនដែលខ្វះខាត ជាបន្តបន្ទាប់ នាពេលកន្លងមកផងដែរ៕

ប្រភព៖ ទីភ្នាក់ងារសារព័ត៌មានកម្ពុជា

ម៉ានូ សិល្បៈ ចេញវីដេអូ ធ្វើការសុំទោសទៅលើសកម្មភាព ក្នុងការប្រកួតកាលពីយប់មិញ

obnasia — Sun, 17 Sep 2023 05:31:10 +0000

ភ្នំពេញ៖ ក្រោយការប្រកួតយប់មិញរួច នឹងទទួលបានការរិះគន់ទាក់ទងនឹងការប្រកួតរបស់ ម៉ានូ សិល្បៈ ។ ពេលនេះគាត់បានចេញមុខមកធ្វើការសុំទោសហើយ ដោយបានសរសេររៀបរាប់ អមជាមួយនឹងវីដេអូផងថា៖

“ខ្ញុំសុំទោសអ្នកទាំងអស់គ្នាចំពោះអ្វីដែលបានកើតឡើងកាលពីយប់មិញ ខ្ញុំដឹងថាវាខុសហើយ មិនមែននៅក្នុងវប្បធម៌ខ្មែរទេ។ សូមពុកម៉ែបងប្អូន និងអ្នកគាំទ្រទាំងអស់ សង្ឃឹមថាអ្នកទាំងអស់គ្នានឹងយល់ថាខ្ញុំជាមនុស្ស ហើយអាចបាត់បង់ការគ្រប់គ្រងពេលខ្លះ។ សន្យាណាថាមិនកើតឡើងម្តងទៀតទេ”៕

កីឡាករប្រដាល់ សុខ ធី បានចូលរួមជាមួយនឹងក្លឹបប្រដាល់របស់ឧកញ៉ា ស្រី ចាន់ថន

obnasia — Sun, 16 Jul 2023 04:43:56 +0000

បរទេស៖ នេះបើយោងតាមការបង្ហោះរបស់ឧកញ៉ា ស្រី ចាន់ថន នៅក្នុងបណ្តាញសង្គមហ្វេសប៊ុកនៅថ្ងៃទី១៦ ខែកក្កដា ឆ្នាំ២០២៣នេះ អោយដឹងថា៖

“ការងារនិងកាតព្វកិច្ចដោះស្រាយកីឡាករប្រដាល់ គុនខ្មែរ សុខ ធី ត្រូវបានបញ្ចប់100%ហើយទាំងនៅប្រទេសថៃនិងនៅក្នុងប្រទេសកម្ពុជា ពាក់ព័ន្ធនិងកិច្ចការងារចាស់ៗពីមុន ដូច្នេះសុខធីចាប់ពីពេលនេះទៅគឺអាចហ្វឹកហាត់នៅក្លឹប(KKIF)របស់ខ្ញុំបាទផ្ទាល់បានដោយពេញលេញ និងសប្បាយចិត្តហើយ។ គាត់នឹងប្រឹងប្រែងបន្តការហ្វឹកហាត់អោយបានពេញលេញសម្រាប់ត្រៀមប្រកួត ក្នុងស្រុកនិងក្រៅស្រុកនាពេលឆាប់ៗខាងមុខនេះ។សូមពុកម៉ែបងប្អូន ជួយគាំទ្រនិងលើកទឹកចិត្តដល់កីឡាករ សុខ ធី ផង។ សូមអរគុណ”៕

អតីតកីឡាករប្រដល់ ឡោ សំណាង ប្រកាសស្វែងរកជំនួយ ក្រោយរងរបួសធ្ងន់ដោយសារគ្រោះថ្នាក់ចរាចរណ៍

obnasia — Sat, 27 May 2023 12:40:17 +0000

ហ្វេសប៊ុក៖ នៅក្នុងកីឡាប្រដល់ បើយើងរំលឹកដល់ឈ្មោះ ឡោ សំណាង ប្រិយមិត្តប្រាកដជានៅចាំរូបគាត់ជាក់ជាមិនខាន ក៏ព្រោះតែគាត់ក៏ជាជើងខ្លាំងមួយរូបផងដែរ។ ហើយនៅថ្ងៃទី២៧ ខែឧសភា ឆ្នាំ២០២៣នេះ តាមរយៈហ្វេសប៊ុករបស់កីឡាករប្រដល់ ឡោ សំណាង បានបង្ហោះស្វែងរកជំនួយ ក្រោយលោកបានជួបនឹងគ្រោះថ្នាក់ចរាចរណ៍ ហើយក៏មិនមានលទ្ធភាពព្យាបាល។ ក្នុងនោះលោកបានសរសេរ៖

“ខ្ញុំបាទកីឡាករ ឡោ សំណាង កូនសូមគោរពសម្តេចពុក ខ្ញុំជួបគ្រោះថ្នាក់ចរាចរណ៍ មិនមានលទ្ធភាពព្យាបាលទេកូនសូមទៅព្យាបាលមន្ទីរពេទ្យសម្តេចពុក”៕

កីឡាករ អេវីរៈខាំឈិត ភូថង នឹងត្រូវប៉ះថៃ ក្នុងវគ្គផ្តាច់ព្រ័ត្រ ដណ្តើមមេដាយមាស

obnasia — Sat, 06 May 2023 06:06:00 +0000

ភ្នំពេញ៖ កីឡាករ អេវីរៈខាំឈិត ភូថង នឹងឡើងប្រកួតវគ្គដណ្ដើមមេដាយមាស ជាមួយកីឡាករថៃ នៅរសៀលថ្ងៃទី៦ ខែឧសភា ឆ្នាំ២០២៣នេះ។ ក្រោយឈ្នះវៀតណាម ក្នុងលទ្ធផលពិន្ទុ ៤ទល់១ លេីវិញ្ញាសាប្រយុទ្ធបុរស ៦៥គីឡូក្រាម នៅវគ្គពាក់កណ្តាលផ្តាច់ព្រត្រ លើវិញ្ញាសារវ៉ូវីណាមស៊ីហ្គេម៕

ប្រភព៖ TVK-នាយកដ្ឋានព័ត៌មាន

កីឡាករ ព្រំ សំណាង ត្រៀមខ្លួនប្រកួតយកមេដាយមាស លើវិញ្ញាសារគុនខ្មែរ

obnasia — Fri, 05 May 2023 07:56:24 +0000

ហ្វេសប៊ុក៖ សម្រាប់ការប្រកួតក្នុងព្រឹត្តិការណ៍ស៊ីហ្គេមលើកទី៣២ ដែលកម្ពុជាធ្វើជាម្ចាស់ផ្ទះនេះ សម្រាប់វិញ្ញាសារ គុនខ្មែរ បានចាប់ឆ្នោតរួចរាល់ហើយ ដោយក្នុងនោះកីឡាករ ព្រំ សំណាង បានឡើងទៅកាន់វគ្គផ្តាច់ព្រ័ត្រហើយ ដោយរងចាំការប្រកួតរវាងកីឡាករវៀតណាម នោងភូមា។

កីឡាករ ព្រំ សំណាង ក៏បានប្តេជ្ញាតស៊ូឱ្យដល់ទីបញ្ចប់ដើម្បីប្រទេសជាតិ គ្រួសារ និងបងប្អូនអ្នកគាំទ្រ៕

កម្មវិធីការប្រកួតកីឡាប្រដាល់គុនខ្មែរ ក្នុងព្រឹត្តិការណ៍ស៊ីហ្គេម នឹងចាប់ធ្វើឡើងនៅថ្ងៃទី៦ ខែឧសភា

obnasia — Fri, 05 May 2023 07:05:21 +0000

ភ្នំពេញ៖ កម្មវិធីការប្រកួតកីឡាប្រដាល់គុនខ្មែរក្នុងព្រឹត្តិការណ៍ស៊ីហ្គេមលើកទី៣២ សម្រាប់ថ្ងៃទី៦ ខែឧសភា ឆ្នាំ២០២៣ ខាងមុខ៕